అభివృద్ధికి బాటలు వేస్తోన్న తెరాసనే గెలుపించుకుందాం: మంత్రి ఎర్రబెల్లి

గ్రేటర్​ ఎన్నికల ప్రచారంలో భాగంగా తెరాస జోరు పెంచింది. హైదరాబాద్​ నాచారం డివిజన్​లో మంత్రి ఎర్రబెల్లి దయాకర్​రావు, ఎమ్మెల్యే గండ్ర వెంకట రమణారెడ్డి ప్రచారం నిర్వహించారు. బల్దియా పోరులో తెరాస 100 సీట్లకు పైగా సాధిస్తుందని మంత్రి ధీమా వ్యక్తం చేశారు.

బల్దియా ఎన్నికల్లో తెరాస ఘన విజయం సాధించడం ఖాయమని మంత్రి ఎర్రబెల్లి దయాకర్​రావు ధీమా వ్యక్తం చేశారు. ప్రజల కోసమే పని చేస్తోన్న తెరాసను ఆదరించాలని ప్రజలను కోరారు. జీహెచ్‌ఎంసీ ఎన్నికల ప్రచారంలో భాగంగా నాచారం డివిజన్ ఎన్నికల ఇన్‌ఛార్జ్ ఎమ్మెల్యే గండ్ర వెంకట రమణారెడ్డి ఆధ్వర్యంలో తెరాస‌ ముఖ్య నాయకులు, కార్యకర్తలు, బూత్ స్థాయి ఇన్‌ఛార్జీలతో ఎన్నికల సమన్వయ సమావేశం జరిగింది. సమావేశానికి మంత్రి ఎర్రబెల్లి దయాకర్ రావు హాజరయ్యారు.

ఏనాడు ప్రజలను పట్టించుకోని భాజపా, కాంగ్రెస్​లకు ఓటేయడం వల్ల ఎటువంటి లాభం లేదని మంత్రి చెప్పారు. అభివృద్ధికి బాటలు వేస్తోన్న తెరాసనే ఆదరించాలని సూచించారు. గ్రేటర్​ ఎన్నికల్లో తెరాస 100 సీట్లకు పైగా గెలిచితీరుతుందని ధీమా వ్యక్తం చేశారు.

ఆరేళ్లలో తెరాస‌ ప్రభుత్వం చేపట్టిన అభివృద్ధి, సంక్షేమ పథకాలే పార్టీ అభ్యర్థుల‌ను గెలిపిస్తాయని అన్నారు. రాష్ట్రంలో గ‌త 60 ఏళ్లలో జ‌ర‌గ‌ని అభివృద్ధి కేవ‌లం ఆరేళ్లలో జ‌రిగిందని పేర్కొన్నారు. సీఎం కేసీఆర్, మంత్రి కేటీఆర్ సారథ్యంలో హైద‌రాబాద్ అద్భుత ప్రగ‌తి సాధించిందని.. విశ్వన‌గ‌రంగా రూపుదిద్దుకుందని గుర్తుచేశారు.

తెరాస ప్రభుత్వం అమలు చేస్తున్న సంక్షేమ పథకాలపై ప్రజల్లో చైతన్యం తేవాల్సిన బాధ్యత పార్టీ కార్యకర్తలపై ఉందని ఆయన చెప్పారు. కారు గుర్తుకు ఓటేసేలా ప్రజలను అప్రమత్తం చేయాలని ఆయన కార్యకర్తలకు పిలుపునిచ్చారు. ఈ కార్యక్రమంలో స్థానిక తెరాస నేతలు, కార్యకర్తలు పాల్గొన్నారు.

• ఇవీ చూడండి: మీరు పైసా ఇవ్వకున్నా... మేం ఎంతో చేశాం: కేటీఆర్