రాష్ట్రంలో 111 జీవో పరిధిలోకి వచ్చే ప్రాంతాల నుంచి ఎల్‌ఆర్‌ఎస్‌కు 20 వేలకుపైగా దరఖాస్తులు వచ్చినట్లు విశ్వసనీయంగా తెలిసింది. 111 జీవో పరిధిలోని గ్రామాల్లో క్రమబద్ధీకరణకు అవకాశం లేదని ప్రభుత్వం ఉత్తర్వుల్లో స్పష్టంగా పేర్కొన్నా.. దరఖాస్తులు రావడం గమనార్హం. ఎల్ఆర్ఎస్ పోర్టల్‌లో ఆయా గ్రామాల పేర్లు అందుబాటులో ఉండకూడదు. కానీ, సాంకేతిక లోపంతో ఈ 84 గ్రామాల పేర్లు కూడా వెబ్‌సైట్‌లో ఉండటంతో దరఖాస్తులు వచ్చినట్లు తెలిసింది.
జీవో 131లో నిబంధనలు స్పష్టంగా ఉన్నందున.. సదరు దరఖాస్తులను తిరస్కరిస్తామని అధికారులు చెబుతున్నారు. మరోవైపు ఎల్‌ఆర్‌ఎస్‌కు దరఖాస్తు చేసుకునేందుకు గడువు గురువారంతో ముగియనుంది. సెప్టెంబరు 31నుంచి బుధవారం వరకూ ఎల్ఆర్ఎస్ కోసం 16,28,844 దరఖాస్తులు వచ్చాయి. ఒక్క బుధవారమే 2.16 లక్షల దరఖాస్తులు రావడం గమనార్హం.
రాష్ట్రంలో భారీ వర్షాలతో నెట్‌వర్క్‌ సమస్యలు, ఎల్ఆర్ఎస్ వెబ్‌సైట్‌లో అంతరాయాల నేపథ్యంలో గడువు పెంచాలనే అంశాన్ని ప్రభుత్వం పరిశీలిస్తోంది. దీనిపై గురువారం నిర్ణయం తీసుకుంటారని సమాచారం.