వైద్యుల నిర్లక్ష్యంతో బాలింత మృతి!

మలక్​పేట ఏరియా ఆస్పత్రి వైద్యుల నిర్లక్ష్యం వల్లే బాలింత మృతి చెందిందని కుటుంబసభ్యులు ఆరోపిస్తున్నారు. వైద్యులపై మృతురాలి కుటుంబసభ్యులు అఫ్జల్​గంజ్​ పీఎస్​లో ఫిర్యాదు చేశారు. పోలీసులు కేసు నమోదు చేసుకుని దర్యాప్తు చేస్తున్నారు.

హైదరాబాద్ మలక్​పేట ఏరియా ఆస్పత్రిలో తుమ్మలూర్ గ్రామానికి చెందిన విశాల (22) అనే గర్భిణీ ఆరో తేదీన కాన్పు గురించి చేరింది. గురువారం 11:30గంటలకు ఆపరేషన్ థియేటర్​లోకి తీసుకువెళ్లి డెలివరీ చేయగా.. ఆమె అపస్మారక స్థితిలోకి వెళ్లింది. వెంటనే మలక్​పేట వైద్యులు ఉస్మానియా ఆసుపత్రికి తరలించారు. ఉస్మానియా వైద్యులు విశాలను చూసి అధిక రక్త స్రావం కావడం వల్ల అపస్మారక స్థితికి వెళ్లిందని సూచించారు.

ఈ రోజు ఉదయం 9గంటల 30 నిమిషాలకు చనిపోయిందని వైద్యులు ధ్రువీకరించారని కుటుంబసభ్యులు తెలిపారు. తన భార్య చనిపోవడానికి మలక్​పేట్ ఏరియా ఆసుపత్రి వైద్యులే కారణమని మృతురాలి భర్త ఆవేదన వ్యక్తం చేశారు. మృతికి కారణమైన వైద్యులపై చర్యలు తీసుకోవాలని డిమాండ్​ చేశారు. కుటుంబసభ్యుల ఫిర్యాదు మేరకు అఫ్జల్​గంజ్​ పోలీసులు కేసు నమోదు చేసుకుని దర్యాప్తు చేస్తున్నారు.

ఇవీ చూడండి: చేపలు పడదామని వెళ్లాడు.. శవమై తేలాడు