KTR at LB Nagar : 'మళ్లీ గెలిపించండి.. హయత్​నగర్​కు మెట్రో తీసుకొస్తాం..'

KTR at LB Nagar Today: వచ్చే ఎన్నికల్లో మళ్లీ టీఆర్ఎస్​ను గెలిపిస్తే హయత్​నగర్​కు మెట్రోరైలు తీసుకొస్తామని రాష్ట్ర పురపాలక శాఖ మంత్రి కేటీఆర్ హామీ ఇచ్చారు. ఎల్బీ నగర్​ నియోజకవర్గంలో పర్యటించిన ఆయన పలు అభివృద్ధి కార్యక్రమాలకు శంకుస్థాపన చేశారు. రాష్ట్రంలో సంక్షేమం- అభివృద్ధి జోడెద్దుల్లా సాగుతున్నాయని తెలిపారు. కేసీఆర్ నాయకత్వంలో ప్రణాళికబద్ధంగా సాగితేనే దేశంలో తెలంగాణకు ప్రత్యేక గుర్తింపు సాధించిందని చెప్పారు.

KTR at LB Nagar Today: హైదరాబాద్‌ ఎల్బీనగర్‌ నియోజకవర్గంలో పలు అభివృద్ధి కార్యక్రమాలకు మంత్రి మల్లారెడ్డి, ఎమ్మెల్యే సుధీర్‌రెడ్డితో కలిసి రాష్ట్ర ఐటీ పురపాలక శాఖల మంత్రి కేటీఆర్ శ్రీకారం చుట్టారు. ఆధునిక సౌకర్యాలతో ఫతుల్లాగూడలో నిర్మించిన హిందూ, ముస్లిం, క్రిస్టియన్‌ల ఆదర్శ వైకుంఠధామాలను ప్రారంభించారు. ఇదే ప్రాంతంలో పెంపుడు జంతువుల కోసం నిర్మించిన శ్మశానవాటికను ప్రారంభించిన కేటీఆర్‌.. బండ్లగూడ చెరువు నుంచి నాగోల్‌ చెరువు వరకు ఎస్​ఎన్​డీపీ నాలా బాక్స్‌ డ్రెయిన్‌ను ప్రారంభోత్సవంలోనూ పాల్గొన్నారు.

అలాగే.. సెంట్రల్ గ్రౌండ్ వాటర్ నుంచి ఫిర్జాదిగూడ వరకు లింక్ రోడ్డు ప్రారంభోత్సవంలో మంత్రులు పాల్గొన్నారు. ఊకదంపుడు ఉపన్యాసాలతో రాష్ట్రాభివృద్ధి జరగలేదన్న కేటీఆర్.. పటిష్ఠమైన ప్రణాళికతో సాధ్యపడిందన్నారు. రాబోయే ఎన్నికల్లో మళ్లీ తెరాస అధికారంలోకి వస్తుందని కేటీఆర్ ధీమా వ్యక్తం చేశారు. వచ్చే ఎన్నికల తర్వాత హైదరాబాద్‌ మెట్రోరైల్‌ను హయత్‌నగర్‌కు విస్తరిస్తామని ఆయన హామీ ఇచ్చారు. నగరం పెరిగుతున్నట్లుగానే అదేస్థాయిలో అభివృద్ధిని చేపట్టనున్నట్లు తెలిపారు.

"అభివృద్ధి సంక్షేమం లక్ష్యాలుగా జోడేద్దుల మాదిరిగా ఈ రెండింటిని జోడించి ముఖ్యమంత్రి కేసీఆర్ గారి నాయకత్వంలో ఈ రాష్ట్రంలో పరిపాలన సాగుతుంది. పేదవాళ్లు సంతోషంగా ఉండాలి. అనే లక్ష్యంతో సంపూర్ణ స్థాయిలో సంతృప్తికర స్థాయిలో ప్రతి పేదవాడికి ప్రభుత్వ పథకాలు అందే విధంగా సంక్షేమ కార్యక్రమాలు రూపకల్పన చేయడం జరిగింది. రాష్ట్రంలో అభివృద్ధి అమోఘమైన రీతిలో జరిగిందని గర్వంగా చెప్తున్నా. ప్రజల తలసరి ఆదాయం రాష్ట్ర సంపద పెరుగుతూ వస్తోంది. పటిష్టమైన ప్రణాళికతో పని చేయబట్టే ఈ అభివృద్ధి సాధ్యమైంది. పల్లెలు గానీ పట్టణాలు గానీ సమతుల్యమైన ప్రగతిని తెలంగాణ సాధించింది ."- కేటీఆర్, ఐటీ, పురపాలక శాఖల మంత్రి

ఇవీ చదవండి: