రాష్ట్రవ్యాప్తంగా ఘనంగా అంతర్జాతీయ మహిళా దినోత్సవం

సృష్టికి మూలమైన మహిళను గౌరవించుకుంటూ రాష్ట్ర వ్యాప్తంగా మహిళా దినోత్సవాన్ని ఘనంగా జరుపుకున్నారు. కుటుంబాన్ని కంటికి రెప్పలా కాపాడే స్త్రీ మూర్తిని తలుచుకుంటూ.. వివిధ కార్యక్రమాలు నిర్వహించారు. వివిధ రంగాల్లో సేవలందించిన పడతులను సన్మానించుకున్నారు. మహిళా సాధికారతతోనే సమాజం పురోగమిస్తుందని వక్తలు ఆకాంక్షించారు.

రాష్ట్ర వ్యాప్తంగా అంతర్జాతీయ మహిళా దినోత్సవాన్ని ఆనందోత్సాహాల నడుమ వేడుకలా నిర్వహించారు. శాస్త్ర, సాంకేతిక రంగాల్లో మహిళలు సాధికారత సాధించాలని గవర్నర్ తమిళిసై సౌందరరాజన్ ఆకాంక్షించారు. వరంగల్ నిట్ ఆధ్వర్యంలో మహిళా సాధికారతపై దృశ్య మాధ్యమం ద్వారా నిర్వహించిన సదస్సుకు గవర్నర్ హాజరయ్యారు. అన్ని రంగాల్లో మహిళలు సాధికారత సాధించేందుకు కృషి చేయాలని తమిళిసై ఆకాంక్షించారు.

అప్పుడే సమానత్వం సాధ్యం..

మహిళలు ఆర్థిక స్వావలంబన సాధించినప్పుడే సమాజంలో నిజమైన సమానత్వం సాధ్యమని ఎమ్మెల్సీ కల్వకుంట్ల కవిత పేర్కొన్నారు. హైదరాబాద్ సోమాజిగూడలో దళిత్ ఇండియన్ ఛాంబర్ ఆఫ్ కామర్స్ అండ్ ఇండస్ట్రీ-డిక్కీ ఏర్పాటు చేసిన కార్యక్రమంలో ఆమె పాల్గొన్నారు. దళిత మహిళలను ప్రోత్సహించడానికి డిక్కీ చేస్తున్న కృషిని కవిత అభినందించారు. అనంతరం మల్లారెడ్డి మహిళా వర్సిటీ కార్యక్రమంలో పాల్గొన్న కవిత.. ప్రభుత్వ పథకాల వల్ల రాష్ట్రంలో బాల్య వివాహాలు తగ్గాయని తెలిపారు.

అన్ని రంగాల్లో అతివలు..

ఇంటర్నేషనల్‌ ఆర్య వైశ్య పెఢరేషన్‌ ఆధ్వర్యంలో నిర్వహించిన కార్యక్రమానికి విద్యా శాఖ మంత్రి సబితా ఇంద్రారెడ్డి, మహిళా కమిషన్‌ ఛైర్‌పర్సన్ సునీతా లక్ష్మారెడ్డి హాజరయ్యారు. పోలీస్​ శాఖలోని వివిధ విభాగాల్లో పనిచేస్తున్న మహిళలు అత్యుత్తమ పనితీరు కనబరుస్తున్నారని హైదరాబాద్ సీపీ అంజనీ కుమార్ తెలిపారు. మహిళా దినోత్సవాన్ని పురస్కరించుకొని పేట్లబుర్జులోని నగర సాయుధ దళాల ప్రధాన కార్యాలయ ఆవరణలో మహిళా కానిస్టేబుళ్లకు క్రికెట్, ముగ్గుల పోటీలు నిర్వహించారు. గెలుపొందిన విజేతలకు బహుమతి ప్రదానం చేశారు. అతివలు అన్ని రంగాల్లో రాణిస్తున్నారని ముఖ్య అతిథిగా హాజరైన మంచు లక్ష్మి అభిప్రాయపడ్డారు.

విజయశాంతి సన్మానం..

హైదరాబాద్ నాంపల్లి పార్టీ కార్యాలయంలో భాజపా నాయకురాలు విజయశాంతి పాల్గొన్నారు. కరోనా వేళ... విశేష సేవలందించిన జీహెచ్​ఎంసీ మహిళా పారిశుద్ధ్య కార్మికులను ఆమె సన్మానించారు. ఎన్టీఆర్​ ట్రస్టు భవన్‌లో జరిగిన కార్యక్రమంలో కరోనా విపత్తు... వేళ విశేష సేవలందించిన మహిళలను సత్కరించారు. తెదేపా రాష్ట్ర అధ్యక్షుడు ఎల్.రమణ, కాట్రగడ్డ ప్రసూన, నందమూరి సుహాసిని తదతరులు హాజరై.. పోలీసు, వైద్యులు, జర్నలిస్టులకు అవార్డులు అందజేశారు. హైదరాబాద్‌ సోమాజీగూడ విల్లా మేరీ విద్యార్థులు ఆడపిల్ల, మహిళలను రక్షించాలంటూ కళాశాల ఆవరణలో ప్రదర్శన చేపట్టి నినదించారు. బేటీ బచావో-బేటీ పడావో నినాదాలకే పరిమితం కావొద్దంటూ ఫ్లకార్డులు ప్రదర్శించారు.

కుట్టు మిషన్లు, పిండిగిర్నిలు..

హైదరాబాద్ నాగోల్‌లో రైస్ ఏటీఎం వద్ద దోసపాటి రాము ఆధ్వర్యంలో 80 మంది మహిళలకు కుట్టు మిషన్లు, పిండి గిర్ని, తోపుడు బండ్లు, ఇస్త్రీ పెట్టెలు పంపిణీ చేశారు. మహిళలు స్వావలంబన సాధించాలని ఆర్థిక భరోసా కల్పిస్తున్నట్లు నిర్వాహకులు తెలిపారు.

రాష్ట్రంలోని మిగతా జిల్లాల్లోనూ మహిళ సంక్షేమ శాఖ, వివిధ ప్రభుత్వ విభాగాల ఆధ్వర్యంలో మహిళా దినోత్సవ వేడుకలు ఘనంగా నిర్వహించారు. ఉత్సవాలకు ఆయా జిల్లాల కలెక్టర్లతో పాటు ప్రజాప్రతినిధులు హాజరై శుభాకాంక్షలు తెలిపారు. మహిళలు, యువతులు సాంస్కృతిక కార్యక్రమాల్లో ఉత్సాహంగా పాల్గొన్నారు.