మద్యం సేవించి వాహనాలు నడిపే వారిని కట్టడి చేసేందుకు సైబరాబాద్ పోలీసులు ప్రత్యేక చర్యలు చేపడుతున్నారు. వివిధ ప్రాంతాల్లో డ్రంక్ అండ్ డ్రైవ్ తనిఖీలు నిర్వహిస్తున్నారు.
పట్టుబడిన వారి వాహనాలు సీజ్ చేసి.. వాహనదారులపై కేసు నమోదు చేసి.. కోర్టులో హాజరుపరుస్తున్నారు. గత మూడు రోజులుగా కమిషనరేట్ పరిధిలో చేపట్టిన డ్రంక్ అండ్ డ్రైవ్ తనిఖీల్లో 928 కేసులు నమోదయ్యాయి. ఈ నెలలో ఇప్పటి వరకు 3వేల 387 డ్రంక్ అండ్ డ్రైవ్ కేసులు నమోదయ్యాయి.
21 నుంచి 40 ఏళ్లలోపు వారే ఎక్కువగా మద్యం తాగి వాహనాలు నడుపుతున్నట్టు పోలీసులు గుర్తించారు. ఈ ఏడాది సైబరాబాద్‌లో ఇప్పటి వరకు మద్యం సేవించి వాహనాలు నడిపిన వ్యవహారంలో 155 రోడ్డు ప్రమాదాలు జరగ్గా... 166 మంది ప్రాణాలు కోల్పోయారు. ఈ నెల 31న కూడా పెద్ద ఎత్తున డ్రంక్ అండ్ డ్రైవ్ తనిఖీలు చేపట్టనున్నట్టు సైబరాబాద్ పోలీసు కమిషనర్‌ సజ్జనార్ తెలిపారు. ప్రజలందరూ పోలీసులు సూచించిన నిబంధనలు పాటించాలని ఆయన కోరారు.
ఇదీ చూడండి:డ్రైవింగ్ లైసెన్స్ల గడువు మరోసారి పెంపు