అమెరికాలో రోడ్డు ప్రమాదం... హైదరాబాదీ దుర్మరణం..

అమెరికాలో విషాదం చోటు చేసుకుంది. ఎమ్మెస్ చదివేందుకు వెళ్లిన హైదరాబాద్ వాసి సాహిత్ రెడ్డి కారు ఢీ కొని చనిపోయాడు. రెండు రోజుల క్రితం ప్రమాద ఘటన జరగ్గా ఆలస్యంగా వెలుగులోకి వచ్చింది. అక్కడి స్నేహితుల ద్వారా విషయం తెలుసుకున్న తల్లిదండ్రులు, బంధువులు తీవ్ర మనోవేదనకు గురయ్యారు.  మృతదేహాన్ని స్వదేశానికి తరలించాలని ప్రభుత్వానికి విజ్ఞప్తి చేశారు.

అమెరికాలోని నార్త్‌కరోలినాలో జరిగిన రోడ్డు ప్రమాదంలో భాగ్యనగర వాసి మృతి చెందాడు. హైదరాబాద్​ నల్లకుంటలోని పద్మాకాలనీకి చెందిన జి.సాహిత్​రెడ్డి అమెరికాలో కారు ఢీ కొన్న ఘటనలో చనిపోయాడు. మృతుడు మధుసూదన్​రెడ్డి, లక్ష్మి దంపతుల పెద్ద కుమారుడు. తండ్రి బీహెచ్​ఈఎల్​ మాజీ ఉద్యోగి కాగా... తల్లి గృహిణి. తమ కుమారుడు ఇక లేడన్న నిజాన్ని తెలుసుకున్న తల్లిదండ్రులు, బంధువులు తీవ్రమనోవేదనకు గురయ్యారు.

మూడేళ్ల క్రితం అమెరికాకు

సాహిత్​రెడ్డి ఎమ్మెస్​ చేయడానికి మూడేళ్ల క్రితం అమెరికాకు వెళ్లాడు. గత సంవత్సరం చదువు పూర్తి చేసి... ఉద్యోగ శిక్షణ నిమిత్తం నార్త్​ కరోలినాలో ఉంటున్నాడు. ప్రతి రోజూ మాదిరిగానే ఈనెల 11న ఉదయం 4 గంటలకు పక్కనే ఉన్న జిమ్​కు వెళ్తుండగా కారు ఢీ కొని చనిపోయాడు. పోలీసులు మృతదేహాన్ని మార్చురీలో భద్రపరిచారు. స్నేహితుని గురించి ఎలాంటి సమాచారం లేకపోవడం వల్ల అతని స్నేహితులు సాహిత్​ అదృశ్యమైనట్లు అక్కడి అధికారులకు ఫిర్యాదు చేశారు. చివరకు రోడ్డు ప్రమాదంలో మృతి చెందిన విషయం తెలిసి తల్లిదండ్రులకు సమాచారమిచ్చారు. తమ కుమారుడి మృతదేహాన్ని స్వదేశానికి తరలించేలా చూడాలని తల్లిదండ్రులు ప్రభుత్వానికి విజ్ఞప్తి చేశారు.

ఇదీ చూడండి : డ్రగ్స్ కేసుపై వార్తలు పాతవే: అకున్ సబర్వాల్