జేఏవో ఉద్యోగాల నియామకం కేసులో హైకోర్టు తీర్పు

నిపుణుల కమిటీ ఇచ్చే నివేదిక ఆధారంగా జేఏవో పోస్టుల భర్తీ ప్రక్రియ చేపట్టాలని తెలంగాణ ఉత్తర విద్యుత్​ పంపిణీ సంస్థను ఉన్నత న్యాయస్థానం ఆదేశించింది. ప్రశ్నపత్రం నోటిఫికేషన్​కు విరుద్ధంగా ఉందని పలువురు అభ్యర్థులు హైకోర్టును ఆశ్రయించారు. సామర్థ్యానికి మించి ప్రశ్నలుండడం వల్ల నష్టపోయామని కోర్టు దృష్టికి తెచ్చారు.

జూనియర్ అకౌంట్స్ అధికారుల ఉద్యోగాల భర్తీకి నిర్వహించిన రాత పరీక్షపై పలువురు అభ్యర్థులు లేవనెత్తిన అభ్యంతరాలతో సహా ప్రశ్న పత్రాలను నిపుణుల కమిటీకి నివేదించాలని తెలంగాణ ఉత్తర విద్యుత్ పంపిణీ సంస్థను హైకోర్టు ఆదేశించింది. తదుపరి నియామక ప్రక్రియను నిపుణుల బృందం ఇచ్చే నివేదిక ఆధారంగా చేపట్టాలంది. ప్రశ్నపత్రం నోటిఫికేషన్​కు విరుద్ధంగా ఉన్నందున... జూలైలో నిర్వహించిన పరీక్షను రద్దు చేయాలని కొందరు అభ్యర్థులు ఉన్నత న్యాయస్థానాన్ని ఆశ్రయించారు. నోటిఫికేషన్​కు అనుగుణంగా పరీక్షకు సిద్ధమయ్యామని... సామర్థ్యానికి మించిన ప్రశ్నలుండడం వల్ల తాము నష్టపోయామని కోర్టు దృష్టికి తీసుకొచ్చారు. తెలుగు అనువాదంలో కూడా తప్పులు దొర్లాయని తెలిపారు.

అభ్యంతరాలుంటే అప్పుడే చెప్పాలి

పరీక్ష పూర్తైన అనంతరం దీనికి సంబంధించిన కీ విడుదల చేశామని... అభ్యంతరాలుంటే అప్పుడే లేవనెత్తాలని టీఎస్ఎన్​పీడీసీఎల్ తరఫు న్యాయవాది విద్యాసాగర్​రావు కోర్టుకు తెలిపారు. ఫలితాలు వెలువడ్డాక ఎంపిక కాకపోవడం వల్ల తప్పులు వెదికే హక్కు అభ్యర్థులకు లేదని అన్నారు. విచారణ జరిపిన ధర్మాసనం అభ్యర్థుల సమస్యలు పరిగణలోకి తీసుకుని... కమిటీ నివేదిక ఆధారంగా ప్రక్రియ చేపట్టాలని తీర్పిచ్చింది.

ఇదీ చూడండి : అమ్మ ఒక మజిలీ కాదు... జీవిత ప్రయాణం