గిరిజన ఉత్పత్తులకు మెరుగైన మార్కెటింగ్ సౌకర్యం కల్పించాలి: తమిళిసై

గిరిజనుల జీవనోపాధి, వారి ఆర్థిక స్థితిగతులు మెరుగుపరచడానికి అన్ని రకాలుగా కృషి చేయాలని అధికారులను గవర్నర్ తమిళిసై ఆదేశించారు. వారి ఉత్పత్తులకు మెరుగైన మార్కెటింగ్ సౌకర్యం కల్పించాలని సూచించారు. జాతీయ, అంతర్జాతీయ మార్కెట్లకు ఈ ఉత్పత్తులు అందేలా చూడాలని అన్నారు.

గిరిజన ఉత్పత్తులకు మరింత మెరుగైన మార్కెటింగ్ సౌకర్యం కల్పించాలని గవర్నర్ తమిళిసై సౌందరరాజన్ అన్నారు. గిరిజనులు వాళ్ల శైలిలో కొన్ని అద్భుతమైన వస్తువులను తయారు చేస్తారని, వాటికి మంచి ధర కల్పించగలిగితే ఆర్థికంగా బలపడేందుకు అవకాశాలుంటాయని అభిప్రాయపడ్డారు. పుదుచ్చేరి నుంచి హైదరాబాద్​లోని రాజ్ భవన్ అధికారులతో వీడియో కాన్ఫరెన్స్ ద్వారా సమీక్షా సమావేశం నిర్వహించారు.

వీడియో కాన్ఫరెన్స్‌లో పాల్గొన్న గవర్నర్‌

అన్ని రకాలుగా కృషి

గిరిజన ఉత్పత్తుల మార్కెటింగ్ కోసం జాతీయ స్థాయిలోనే ట్రైబల్ కోపరేటివ్ మార్కెటింగ్ ఫెడరేషన్ ఆఫ్ ఇండియా వారి సహకారం తీసుకోవాలని సూచించారు. గిరిజనుల జీవనోపాధి, వారి ఆర్థిక స్థితిగతులు మెరుగుపర్చడానికి అన్ని రకాలుగా కృషి చేయాలని అన్నారు. అవసరమైతే జాతీయ, అంతర్జాతీయ మార్కెట్లకు ఈ ఉత్పత్తులు అందేలా చూడాలని రాజ్‌భవన్ అధికారులకు గవర్నర్ సూచించారు.

త్వరలో సర్వే

గిరిజనుల పోషకాహార అవసరాలు మెరుగుపర్చేందుకు చేపట్టనున్న పైలట్ ప్రాజెక్టు వివరాలను గవర్నర్ సమీక్షించారు. నేషనల్ ఇనిస్టిట్యూట్ ఆఫ్ న్యూట్రిషన్, రెడ్ క్రాస్ సంస్థల సహకారంతో వారి పోషకాహార అవసరాలపై త్వరలోనే సర్వే నిర్వహించాలని నిర్ణయించారు.

దిగ్భ్రాంతి

సూర్యాపేటలో జాతీయ జూనియర్ కబడ్డీ పోటీల సందర్భంగా జరిగిన ప్రమాదంలో ప్రేక్షకులు గాయపడడం పట్ల గవర్నర్ ఆవేదన వ్యక్తం చేశారు. గాయపడినవారికి సాయం చేయడానికి అవసరమైన సేవలు అందించాలని గవర్నర్ తమిళిసై ఆదేశించారు.

ఇదీ చదవండి:విద్యార్థులపై కరోనా పంజా.. రాష్ట్రంలో సెకండ్ వేవ్ ప్రారంభమైందా?