'చేనేత కార్మికుల సమస్యలు పరిష్కరించడంలో ప్రభుత్వాలు విఫలం'

హైదరాబాద్​ నారాయణగూడలోని పద్మశాలి భవన్​లో తెలంగాణ పద్మశాలి సంఘం ఆధ్వర్యంలో చేనేత కార్మికులు నిరాహార దీక్ష చేపట్టారు. వారికి మద్ధతుగా పలువురు అఖిలపక్ష నేతలు దీక్షలో పాల్గొన్నారు.

చేనేత కార్మికుల సమస్యలు పరిష్కరించడంలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని అఖిలపక్ష నేతలు ఆరోపించారు. నారాయణగూడలోని పద్మశాలి భవన్​లో తెలంగాణ పద్మశాలి సంఘం ఆధ్వర్యంలో చేనేత కార్మికులు నిరాహార దీక్ష చేపట్టారు. ఈ దీక్షలో తెతెదేపా రాష్ట్ర అధ్యక్షులు ఎల్.రమణ, తెజస అధ్యక్షులు కోదండరామ్, సీపీఐ, సీపీఎం రాష్ట్ర కార్యదర్శులు చాడ వెంకట్ రెడ్డి, తమ్మినేని వీరభద్రం, భాజపా ఎమ్మెల్సీ రాంచందర్​రావు తదితరులు పాల్గొన్నారు.

రాష్ట్రంలో చేనేత కార్మికుల పరిస్థితి దయనీయంగా మారిందని నాయకులు ఆరోపించారు. కరోనా నేపథ్యంలో వారిని ఆదుకోవాల్సిన కేంద్ర, రాష్ట్ర ప్రభుత్వాలు.. పట్టించుకోకపోవడం దారుణమని మండిపడ్డారు. రాష్ట్రంలో చేనేత కార్మికుల ఆత్మహత్యల పరంపర కొనసాగుతున్నా.. ముఖ్యమంత్రి కేసీఆర్, ఆ శాఖ మంత్రి కేటీఆర్ నిమ్మకు నీరెత్తినట్లుగా వ్యవహరిస్తున్నారని విమర్శించారు.

చేనేతకు ప్రధాన భూమిక సిరిసిల్ల అని.. ఆ నియోజకవర్గానికి ప్రాతినిథ్యం వహిస్తున్న మంత్రి కేటీఆర్... చేనేత రంగానికి అన్ని విధాలా అండగా ఉంటామని గొప్పలు చెప్పుకోవడమే తప్పా.. ఆచరణలో చూపించడం లేదన్నారు. ఇప్పటికైనా ప్రభుత్వం చేనేత కార్మికుల కనీస కోరికలను తీర్చాలని.. లేనిపక్షంలో అఖిలపక్షం ఆధ్వర్యంలో రాష్ట్ర వ్యాప్తంగా ఉద్యమాన్ని మరింత ఉద్ధృతం చేస్తామని హెచ్చరించారు.

ఈ సందర్భంగా ఇటీవల మృతి చెందిన 9 మంది చేనేత కుటుంబాలకు ఒక్కో కుటుంబానికి రూ.10 వేల చొప్పున ఎల్. రమణ డబ్బులు అందజేశారు.

ఇవీచూడండి:సుప్రీంకోర్టులో మరోసారి ఏపీ ప్రభుత్వానికి చుక్కెదురు