తెలుగు రాష్ట్రాల్లో వారం రోజుల పర్యటన ఎంతో సంతృప్తినిచ్చిందని సుప్రీంకోర్టు ప్రధాన న్యాయమూర్తి జస్టిస్ ఎన్వీ రమణ వెల్లడించారు. తెలుగు ప్రజలకు ధన్యవాదాలు తెలిపారు. ఆదరాభిమానాలు చూపిన ప్రజలకు శతకోటి వందనాలు చెబుతున్నట్లు పేర్కొన్నారు. తెలుగు రాష్ట్రాల పర్యటనలో భావోద్వేగానికి గురయ్యానన్నారు. తెలుగు ప్రజల దీవెనలతో సీజేఐ బాధ్యతలు సమర్థంగా నిర్వహిస్తానని స్పష్టం చేశారు.
తెలంగాణ గవర్నర్‌, సీఎం, హైకోర్టు సీజే, న్యాయమూర్తులు, మంత్రులు, ప్రజాప్రతినిధులు, సకల పక్షాల నాయకులు, అధికారులకు జస్టిస్ ఎన్వీ రమణ ధన్యవాదాలు తెలిపారు. రాజ్‌భవన్‌, హైకోర్టు, పోలీసు సిబ్బంది, పాత్రికేయులకు కృతజ్ఞతలు తెలిపారు. కంటికి రెప్పలా చూసుకున్న తెలంగాణ అధికారులకు కృతజ్ఞతలు తెలిపారు.