ఆకలి తీర్చే 'యాప్'

'ఫీడ్ ద నీడ్' కార్యక్రమాన్నిజీహెచ్ఎంసీ విస్తృతం చేయనుంది. ఆహార వ్యర్థాలను నివారించి, పేదవారి కడుపు నింపేందుకు వినూత్న కార్యక్రమం చేపట్టింది.

హైదరాబాద్ మహానగరపాలక సంస్థ నూతన కార్యక్రమానికి శ్రీకారం చుట్టింది. మొబైల్ అప్లికేష‌న్ ద్వారా అన్నార్థుల ఆకలి తీర్చాల‌ని నిర్ణయించింది. స్వచ్ఛంద సంస్థల స‌హ‌కారంతో మిగిలిపోయిన ఆహారాన్ని సేక‌రించి అవ‌స‌ర‌మైన వారికి అందించనుంది. ఈనెల 14న ఈ కార్య‌క్రమాన్ని ప్రారంభించాల‌ని భావిస్తోంది.

ఆక‌లితో అల‌మ‌టిస్తున్న వారికి భోజ‌నం అందించే 'ఫీడ్ ద నీడ్' కార్యక్రమాన్ని విస్తృతం చేయనున్నారు. న‌గ‌రంలోని హోట‌ల్ య‌జ‌మానుల‌తో బ‌ల్దియా కార్యాల‌యంలో స‌మావేశం నిర్వహించారు. గ్రేటర్ పరిధిలో ఉత్పత్తి అవుతున్న చెత్తలో 15శాతం ఆహార పదార్థాలు వ్యర్థమవుతున్నాయి. ఇంతటి భారీ స్థాయిలో ఆహారం వృథా కాకుండా ఆకలితో అలమటిస్తున్న వారికి అందించాలని "ఫీడ్ ద నీడ్" కార్యక్రమం చేపడుతున్నామని దానకిషోర్ తెలిపారు.
శిల్పారామం, జూబ్లీ చెక్ పోస్ట్ స‌ర్కిల్ వ‌ద్ద ఆహార ప‌దార్థాల‌ను నిల్వ ఉంచడానికి రిఫ్రిజిరేట‌ర్స్​ను ఏర్పాటు చేశామ‌న్నారు. ఆహారాన్ని త‌నిఖీ చేసిన త‌రువాత అందిస్తామ‌న్నారు. ఫ్రిజ్​లు లేకుండా అన్నార్థుల‌కు ఆహారం చేర్చడమే లక్ష్యమని క‌మిష‌న‌ర్ వెల్లడించారు.