పోరుబాటలో అఖిల భారత రైతు - కూలీ సంఘం

పోడు భూముల నుంచి గెంటివేత ఆపాలని డిమాండ్ చేస్తూ అఖిల భారత రైతు - కూలీ సంఘం పోరుబాట పట్టనుంది. దేశంలో ప్రత్యేకించి రాష్ట్రంలో పోడు భూముల్లో సాగు చేసుకుంటున్న గిరిజన, ఆదివాసీ రైతు కుటుంబాలకు అండగా నిలవాలని నిర్ణయించింది. హైదరాబాద్‌లో ఏఐకేఎంఎస్ ఆధ్వర్యంలో అఖిల భారత గిరిజనుల సదస్సు జరిగింది. గిరిజన, రైతు సంఘాలతో కలిసి ఐక్యంగా ఉద్యమించాలని జాతీయ సదస్సు ఏకగ్రీవ తీర్మానం చేసింది.

ఆసిఫాబాద్, భద్రాద్రి కొత్తగూడెం జిల్లాల్లో నెలకొన్న ఉద్రిక్త పరిస్థితుల నేపథ్యంలో దేశవ్యాప్తంగా పోడు భూముల సాగుదారులందరికీ హక్కు పత్రాలు ఇవ్వాలని అఖిల భారత రైతు - కూలీ సంఘం డిమాండ్ చేసింది. అటవీ హక్కుల చట్టం - 2006లో పేర్కొన్న 13 రకాల హక్కులు అమలు చేయడం ద్వారా గిరిజన, ఆదివాసీ రైతులకు.... పోడు భూములపై హక్కలు కల్పిస్తూ పట్టాలు జారీ చేయాలని అఖిల భారత రైతు కూలీ సంఘం దేశవ్యాప్తంగా ఉద్యమానికి శ్రీకారం చుట్టనుంది. ఉత్తరప్రదేశ్, రాజస్థాన్, మహారాష్ట్రలో రైతుల ఉద్యమాలు, నాసిక్ - ముంబయి మహా పాదయాత్ర తరహాలో గత పోరాటాలు స్ఫూర్తిగా తీసుకుని పోడు భూముల రక్షణ కోసం ఐక్య ఉద్యమాలే శరణ్యమని నిర్ణయించింది.

రాష్ట్రంలో ఇటీవల చోటుచేసుకున్న పోడు భూముల వివాదాల కారణంగా హైదరాబాద్ బాగ్‌లింగంపల్లి సుందరయ్య విజ్ఞాన కేంద్రంలో అఖిల భారత రైతు కూలీ సంఘం ఆధ్వర్యంలో అఖిల భారత గిరిజన సదస్సు జరిగింది. ఖమ్మం, భద్రాద్రి కొత్తగూడెం, ఆదిలాబాద్, ఆసిఫాబాద్‌, భూపాలపల్లి జయశంకర్ తదితర జిల్లాల నుంచి పోడు భూముల రైతులు తరలివచ్చారు.

పోడు భూములు, ఆదివాసీలపై అటవీ శాఖ, పోలీసుల వేధింపులు, నిర్బంధాలు, క్రిమినల్ కేసులు, ఇతర అంశాలపై సదస్సులో విస్తృతంగా చర్చించారు. గిరిజన గ్రామాల్లో సమస్యలు పరిష్కరిస్తానని గతంలో ప్రకటించిన ముఖ్యమంత్రి కేసీఆర్... తక్షణమే చర్యలకు ఉపక్రమించాలని వారు విజ్ఞప్తి చేశారు.

అటవీ సాగు భూముల హక్కు పత్రాల లేకపోవడం వల్ల బ్యాంకుల్లో రైతులకు రుణాలు లభించడం లేదు. రైతుబంధు, జీవిత బీమా, రాయితీలు, ఇతర పథకాలు ఏ మాత్రం వర్తించక అన్నదాతలు తీవ్రంగా నష్టపోతున్నారు. వేలాది మందిపై తప్పుడు కేసులు బనాయిస్తూ నాయకులపై పీడీ చట్టం ప్రయోగిస్తున్నారు. కొందరైతే కారాగారాల్లోనే మగ్గిపోతున్నారు.

సమాజంలో అన్ని విధాలుగా నేటికీ వెనుకబడి ఉన్న గిరిజనులపై.... కత్తికట్టినట్లుగా కేంద్ర, రాష్ట్ర ప్రభుత్వాలు వ్యవహరిస్తున్నాయని సదస్సు వేదికగా ఆందోళన వ్యక్తమైంది. గిరిజన, ఆదివాసీల కుటుంబాలకు జీవనాధారంగా ఉన్న అటవీ భూముల నుంచి తరిమేయడానికి పెద్ద ఎత్తున కుట్ర జరుగుతుందని ప్రతినిధులు సభలో ప్రస్తావించారు. రాష్ట్రంలో గిరిజనులపై సాగుతున్న బెదిరింపులు, అక్రమ కేసుల బనాయింపులు ఆపేసి భూమి హక్కు పత్రాలు ఇవ్వాలని సీపీఐఎంఎల్ న్యూడెమెక్రసీ నేతలు డిమాండ్ చేశారు.

క్షేత్రస్థాయిలో భూమి హక్కు పత్రాల తిరస్కరణకు గల కారణాలు దరఖాస్తుదారులు తెలుసుకోవడం, అప్పీలు చేసుకోవడానికి కూడా కల్పిస్తున్న అవకాశాలు సద్వినియోగం చేసుకోవాలని అఖిల భారత రైతు కూలీ సంఘం విజ్ఞప్తి చేసింది.

ఇదీ చూడండి:నేటి నుంచి కొత్త జడ్పీల పాలన