ఈఎస్ఐ కుంభకోణం: డొల్ల కంపెనీలతో కోట్లు స్వాహా... కార్మికుల వైద్య ఖర్చుల కోసం, బీమా వైద్య సేవల కోసం కేంద్రప్రభుత్వం ఏటా సుమారు 200 కోట్ల బడ్జెట్ మంజూరు చేస్తుంది. అధికారులు, దళారులు కుమ్మక్కై ఈ నిధులను అందినకాడికి దోచుకున్నారు. మార్కెట్లో అనేక సంస్థలు అందుబాటులో ఉన్నప్పటికీ ఒకటి, రెండు ఔషద సంస్థలకే మందుల సరఫరాకు ఒప్పందం కుదుర్చుకున్నారు.
ప్రభుత్వానికి రూ.11.70కోట్లు నష్టం
గతంలో లెజెండ్ ఫార్మా సరఫరా చేసిన స్ట్రిప్లకు సంబంధించి 2017 ఏప్రిల్ 20 నుంచి డిసెంబరు 5వ తేదీ వరకు మొత్తం సుమారు 55 కోట్ల బిల్లులు మంజూరు చేశారు. తెల్ల రక్తకణాలు లెక్కించే ఒక్కో పరికరం విలువ 11వేల 800 కాగా దానిని 36వేలకు కొనుగోలు చేశారు. ఇలా ఈ ఒక్క సంస్థకు 8 నెలల కాలంలో మంజూరు చేసిన బిల్లుల వల్ల ప్రభుత్వానికి 11.70 కోట్ల నష్టం జరిగినట్లు అనిశా అధికారులు తేల్చారు. ఇంత అధిక ధరకు ఒకే సంస్థ వద్ద ఒప్పందాన్ని కుదుర్చుకోవడాన్ని బట్టి చూస్తే అక్రమాలు ఏ స్థాయిలో జరిగాయో అర్థం చేసుకోవచ్చు.
ఓమ్మి మెడి ఓ డొల్ల సంస్థ
లెజెండ్ ఫార్మాలో జమ అయిన డబ్బంతా ఆ తర్వాతి కాలంలో ఓమ్ని మెడిలోకి బదిలీ అయినట్లు తేలింది. ఈ సంస్థ లెజెండ్ ఫార్మాకు డొల్ల సంస్థగా తేలిందని ఓ అధికారి వ్యాఖ్యానించారు. ప్రధానంగా తెల్లరక్తకణాలు లెక్కించడం, రక్తంలో చక్కెర స్థాయి కొలిసేందుకు ఉపయోగించే స్ట్రిప్ కొనుగోలు పేరుతోనే ఈ కుంభకోణం జరిగిందని అధికారులు తేల్చారు.
ఒక్క సంస్థకు... రెండు చిరునామాలా
లెజెండ్ ఫార్మాకు రెండు వేర్వేరు చిరునామాలు ఉండటం కూడా ఇప్పుడు అనుమానాలు రేకెత్తిస్తోంది. 2018లో ఈ సంస్థను వాణిజ్యపన్నుల శాఖ కూకట్‌పల్లిలోని రాజీవ్ గాంధీనగర్లో ఓ ఇంటి నంబరుతో నమోదు చేయించారు. కాని ఔషధ నియంత్రణ శాఖ వద్ద నమోదు చేయించినప్పుడు మాత్రం మరో చిరునామాగా పేర్కొన్నారు. ఇలా రెండు వేర్వేరు చిరునామాలు ఎందుకు ఇచ్చారన్నది కూడా ఇప్పుడు ఆసక్తికరంగా మారింది . దీనిపైనా అనిశా అధికారులు లోతుగా దర్యాప్తు చేస్తున్నారు.
ఇదీచూడండి.'ఈటీవీ భారత్'ను సందర్శించిన సూపర్స్టార్ రజనీ
