'ప్రమాదాల నివారణకు తాత్కాలిక చర్యలను 15లోగా పూర్తి చేయాలి'

రాష్ట్రంలో రోడ్డు ప్రమాదాల నివారణ కోసం తీసుకోవాల్సిన తాత్కాలిక జాగ్రత్త చర్యలను జనవరి 15లోపు పూర్తి చేయాలని అధికారులను సీఎస్​ సోమేశ్​ కుమార్​ ఆదేశించారు. ఈ మేరకు సంబంధిత అధికారులతో కలిసి బీఆర్కే భవన్​లో సమావేశం నిర్వహించారు. ముఖ్యమంత్రికి సమర్పించేందుకు అవసరమైన నివేదికను వారంలోగా తయారు చేయాలని సూచించారు.

రాష్ట్రంలో రోడ్డు ప్రమాదాల నివారణ కోసం తీసుకోవాల్సిన తాత్కాలిక చర్యలను జనవరి 15లోగా పూర్తి చేయాలని ప్రభుత్వ ప్రధాన కార్యదర్శి సోమేశ్​ కుమార్ అధికారులనుఆదేశించారు. రహదారి భద్రత చర్యలపై పలు శాఖల ఉన్నతాధికారులతో కలిసి బీఆర్కే భవన్​లో సమావేశం నిర్వహించారు. చర్యలకు సంబంధించి పూర్తి వివరాలను పంపాలని జాతీయ రహదారులు, ఆర్అండ్​బీ, పంచాయతీ రాజ్, జీహెచ్ఎంసీ ఇంజనీరింగ్ విభాగాలను ఆదేశించారు.

పటిష్ఠంగా డేటా...

రోడ్డు ప్రమాదాలకు సంబంధించి డేటా సేకరణను మరింత పటిష్ఠంగా సేకరించడానికి జియో కో ఆర్డినేట్​, ఫోటోగ్రాఫ్​లతో యాప్​ను అభివృద్ధి చేయాలని సీఎస్​ పేర్కొన్నారు. ప్రమాదాలు జరిగే ప్రాంతాలను గుర్తించి సరైన సైన్ బోర్డులను ఏర్పాటు చేయాలని సూచించారు. స్పీడ్ గన్స్ కెమెరాలతో ప్రత్యేక సెక్యూరిటీ సేప్టీ ప్లాన్​ను రూపొందించి అవసరమైన చర్యలను అమలు చేయాలని తెలిపారు. ట్రామా కేసులకు తక్షణ వైద్య సాయం అందించేలా యూనిఫైడ్ అంబులెన్స్ నెట్ వర్క్, ట్రామా సెంటర్స్ లాంటి అంశాలను అధ్యయనం చేయడానికి కమిటీని ఏర్పాటు చేయాలని నిర్ణయించారు.

వారంలోగా నివేదిక

వీటన్నిటి పైన ముఖ్యమంత్రికి సమర్పించేందుకు అవసరమైన నివేదికను వారంలోగా తయారు చేయాలని సీఎస్​ కోరారు. ప్రమాదాల బాధితుల ప్రాణాల రక్షణ కోసం ఈఎంఆర్ఐ ద్వారా వాలంటీర్లకు 'యాక్టివ్ బ్లీడింగ్ కంట్రోల్' శిక్షణ పెద్ద ఎత్తున చేపట్టి విస్తృతమైన మార్పును తీసుకురావాలన్నారు. ప్రభుత్వ డ్రైవర్లు, ఇన్​స్టిట్యూషన్ డ్రైవర్లకు రహదారి భద్రత చర్యలపై మరింత అవగాహన కల్పించేలా ప్రత్యేక శిక్షణా కార్యక్రమాన్ని నిర్వహించాలని పేర్కొన్నారు.

ఇదీ చదవండి:బొమ్మ వెంకన్న విగ్రహావిష్కరణలో బండి సంజయ్​, గంగుల