యూరప్ ఖండంలోని పలు దేశాల్లో కరోనా విజృంభిస్తుండటం వల్ల తెలుగు రాష్ట్రాల్లో వేల మంది తల్లిదండ్రులు తీవ్రంగా కలవరపడుతున్నారు. అమెరికా, కెనడా, ఆస్ట్రేలియాలోనే కాకుండా.. యూరప్ దేశాల్లోనూ తెలంగాణ, ఆంధ్రప్రదేశ్‌లకు చెందిన వారు అధిక సంఖ్యలో ఉన్నత విద్యనభ్యసిస్తున్నారు. దీనితో తమ పిల్లలు అక్కడ ఎలా ఉన్నారోనని నిత్యం ఇక్కడ తల్లిదండ్రులు ఆరా తీస్తున్నారు.
కరోనా వైరస్ శరవేగంగా వ్యాపిస్తూ వందల మంది ప్రాణాలు కోల్పోతుండటం వల్ల పలువురు విద్యార్థులు స్వదేశానికి కూడా రాలేని పరిస్థితి మరింత ఆందోళన కలిగిస్తోంది. భారతీయ విద్యార్థులు ప్రపంచవ్యాప్తంగా 90 దేశాల్లో ఉన్నట్లు కేంద్ర విదేశీ వ్యవహారాల శాఖ గణాంకాలు పేర్కొంటున్నాయి. అమెరికా, కెనడా, ఆస్ట్రేలియా, న్యూజిలాండ్‌లో పెద్దసంఖ్యలో మన విద్యార్థులున్నారు. వాటితో పాటు యూరప్ దేశాలైన యూకే సహా ఇతర 15 దేశాల్లోనూ అధిక సంఖ్యలో చదువుతున్నారు. వాటిల్లో ఒక్క బ్రిటన్‌ 2018 ఏప్రిల్‌ నుంచి 2019 మార్చి వరకు 21,115 మంది భారతీయ విద్యార్థులకు వీసాలు జారీ చేసింది. యూరప్లో ప్రస్తుతం తెలుగు రాష్ట్రాల విద్యార్థుల సంఖ్య కనీసం 20 శాతం ఉంటుందని నిపుణుల అంచనా.
ఆ దేశాలకే ఎందుకంటే?
- యూరప్ దేశాల్లో బ్రిటన్‌ తప్ప పలుచోట్ల ఫీజులు తక్కువ. కొన్ని దేశాల్లో అవీ లేవు.
- విభాగాల వారీగా నాణ్యమైన విద్య అందే దేశాలను ఎంచుకుంటున్నారు. ఉదాహరణకు మెకానికల్‌ ఇంజినీరింగ్‌ కోసం జర్మనీ వెళ్లే వారి సంఖ్య ఎక్కువ.
- తెలుగు రాష్ట్రాల్లో ఎంటెక్‌ పూర్తిచేసిన వారు పీహెచ్‌డీ, పోస్టు డాక్టొరల్‌ ఫెలోషిప్‌(పీడీఎఫ్‌) కోసం యూరప్ దేశాలనే అధికంగా ఎంచుకుంటున్నారు.
- జేఎన్‌టీయూ హైదరాబాద్‌, కాకినాడ వర్సిటీలకు స్వీడన్‌లోని బ్లెకింగ్‌ విశ్వవిద్యాలయంతో ఒప్పందాలున్నాయి. ఇక్కడ క్యాంపస్‌లో రెండేళ్ల తర్వాత మరో రెండేళ్లు స్వీడన్‌లో చదువుతారు. ఇలా ప్రతిఏటా తెలుగు రాష్ట్రాల నుంచి 100 మంది వరకు అక్కడికి వెళతారు.
- 26న రావాల్సింది... ప్రయాణాన్ని రద్దు చేసుకున్నాడు.