దేశంలోని పలు రాష్ట్రాల్లో కరోనా పంజా విసురుతోంది. తగ్గినట్టే తగ్గి మళ్లీ విజృంభిస్తుండడం పట్ల ప్రజల్లో ఆందోళన నెలకొంది. మహారాష్ట్ర, పంజాబ్, ఛత్తీస్‌గడ్, మధ్యప్రదేశ్ తదితర రాష్ట్రాల్లో కొవిడ్‌ కేసులు గణనీయంగా పెరుగుతున్నాయి. దీంతో ఆయా రాష్ట్ర ప్రభుత్వాలు... వైరస్ ఉద్ధృతి ఉన్న ప్రాంతాల్లో తిరిగి లాక్‌డౌన్‌లు విధించడం సహా ప్రజలు స్వీయ నియంత్రణ పాటించాలని మార్గదర్శకాలు జారీ చేశాయి. రాష్ట్ర సరిహద్దు జిల్లాల్లోనూ కొత్త రకం కరోనా కేసులు పెద్దసంఖ్యలో వెలుగుచూస్తుండడంతో.... వైద్యారోగ్యశాఖ ముందస్తు నివారణ చర్యలపై దృష్టిసారించింది. పరీక్షల సంఖ్య పెంచడంతో పాటు అవగాహన కార్యక్రమాలను విస్తృతం చేసింది. కొవిడ్‌ నిబంధనలు ప్రతి ఒక్కరూ పాటించాలని సూచించింది.
దక్షిణ భారతదేశంలో వేగంగా విస్తరిస్తున్న వైరస్
దక్షిణ భారతదేశంలో వేగంగా విస్తరిస్తున్న కొత్త రకం కరోనా ఎన్-440కే, డబ్ల్యూ484కే స్ట్రెయిన్ల ఉనికి తెలంగాణలోనూ ఉన్నాయని కేంద్రం ప్రకటించింది. గత కొన్ని రోజులుగా ప్రజలు కొవిడ్‌ నిబంధనలను విస్మరిస్తుండడం వల్ల కొవిడ్‌ కేసులు పెరుగుతున్నట్లు గణంకాలు వెల్లడిస్తున్నాయి. ఇటీవల కరీంనగర్ జిల్లాలో అంత్యక్రియల్లో పాల్గొన్న వారిలో సుమారు 37 మంది వైరస్ బారిన పడ్డారు. పెద్దపల్లి జిల్లాలోని ఓ టోల్‌గేట్‌లో పనిచేసే సిబ్బందికి సైతం కరోనా సోకింది. దీంతో అప్రమత్తమైన రాష్ట్ర ప్రభుత్వం పొరుగు రాష్ట్రాల నుంచి రాకపోకలపై ప్రత్యేక దృష్టిసారించాలని అధికారులకు సూచించింది. టిమ్స్, గాంధీ, నిమ్స్ సహా అన్ని ప్రధాన ఆస్పత్రుల్లోనూ సౌకర్యాలను మెరుగుపర్చాలని ఆదేశాలు జారీ చేసింది.