ముచ్చటైన నిర్మాణం , రకరకాల మొక్కలతో వెదజల్లుతున్న పచ్చదనం.. వెరసి బల్కంపేటలో ఆధునిక హంగులతో నిర్మాణం జరుపుకొంటున్న వైకుంఠధామం పనులు దాదాపు పూర్తి కావచ్చాయి. ఒకప్పుడు పిచ్చి మొక్కలు, చెత్తతో నిండిపోయి అధ్వాన్నంగా ఉండే ఈ శ్మశానవాటికను దాదాపు రూ.కోట్లతో ఆధునికీకరించారు. మూడేళ్ల క్రితం ప్రారంభమైన ఈ పనులు కొంత జాప్యమైనా.. మంత్రి తలసాని శ్రీనివాస్ యాదవ్ చొరవతో ఎట్టకేలకు చివరి దశకు చేరాయి.
ఆధునిక హంగులతో శ్మశానవాటికను సుందరంగా తీర్చిదిద్దారు. లోపల రకరకాల మొక్కలు, చెట్లతో పచ్చదనం వెదజల్లుతోంది. మరుగుదొడ్లు స్నానాలగదులు వంటివి ఆధునికంగా నిర్మించారు. అప్పట్లో ఈ శ్మశానవాటికను శంఖు ఆకారంలో నిర్మించాలని జీహెచ్ఎంసీ అధికారులు నిర్ణయించారు. ప్రస్తుతం వైకుంఠధామం బయట పనులు చురుగ్గా సాగుతున్నాయి. ప్రహరీకి వేసిన డిజైన్ ప్రధాన రహదారిలో వెళ్లే వాహనాదారులను ప్రత్యేకంగా ఆకర్షిస్తుంది.
మంత్రి తలసాని ప్రత్యేక శ్రద్ధ
దాదాపు రెండు ఎకరాల పైచిలుకు విస్తీర్ణం ఉండే ఈ శ్మశానవాటికను అభివృద్ధి చేయాలని మూడేళ్ల క్రితం మంత్రి తలసాని నిర్ణయించారు. అప్పట్లో మంత్రి కేటీఆర్ చేతుల మీదుగా శంకుస్థాపన చేయించారు. మొదట పనులు కొంత వేగంగా జరిగినా తరువాత నెమ్మదించి, క్రమంగా ఆగిపోయాయి. జీహెచ్ఎంసీ నిధులు ఇవ్వకపోవడం వల్ల గుత్తేదారు నిర్మాణ పనులు నిలిపివేశారు. మంత్రి తలసాని ప్రత్యేక శ్రద్ధ చూపించి... జీహెచ్ఎంసీ ఉన్నతాధికారులతో మాట్లాడి చర్యలు తీసుకున్నారు. మూడు పర్యాయాలు మంత్రి కేటీఆర్ను ఇక్కడకు తీసుకొచ్చి అభివృద్ధి పనులను చూపించడం వల్ల కావాల్సిన నిధులు మంజూరయ్యాయి. పనులను ఎప్పటికప్పుడు మంత్రి తలసాని స్వయంగా పర్యవేక్షించి త్వరగా పూర్తయ్యేలా చూశారు. త్వరలో వైకుంఠధామం ప్రారంభానికి సిద్ధం అవుతుందని సనత్నగర్ కార్పొరేటర్ కొలను లక్ష్మి తెలిపారు.
ఇవీ చూడండి: మరో రెండు పారిశ్రామిక పార్కులు... తెలంగాణ ప్రభుత్వ నిర్ణయం
