Asaduddin Owaisi Counter Tweet to Modi Tweet : హైదరాబాద్‌కు రావడం ఎల్లప్పుడూ ప్రత్యేకమని.. నగరంలోని లాల్‌బహదూర్ శాస్త్రి స్టేడియానికి తిరిగి రావడం మరింత ప్రత్యేకమంటూ ప్రధానమంత్రి నరేంద్ర మోదీ ట్వీట్ చేశారు. ప్రధాని ట్వీట్కు ఎంఐఎం అధినేత అసదుద్దీన్ ఓవైసీ (MIM Chief Asaduddin Owaisi) కౌంటర్ ఇచ్చారు. ప్రధాని మోదీ కుల గుర్తింపుపై ఓట్లు వేయాలని విజ్ఞప్తి చేస్తున్నారని ఆరోపించారు. కానీ ఓబీసీలకు న్యాయం చేయాలని కోరుకోవడం లేదని ఆయన విమర్శించారు.
రిజర్వేషన్లపై 50 శాతం సీలింగ్‌ను తొలగించలేదని అసద్దుదీన్ ఒవైసీ ఆరోపించారు. మరోవైపు 27 శాతం ఓబీసీ కోటాను పెంచడాన్ని మోదీ వ్యతిరేకిస్తున్నారని ఎక్స్ వేదికగా మండిపడ్డారు. భారత రాజకీయాల్లో ముస్లింల ప్రాతినిధ్యం తక్కువగా ఉందని తాను చెప్పినప్పుడు, తనను జాతీయ వ్యతిరేకి, మతవాదని పిలిచారని గుర్తు చేశారు. మోదీ నిరాశలో ఉన్నారని తెలుస్తోందని అసద్దుదీన్ ఒవైసీ ఎద్ధేవా చేశారు.
'దిల్లీ దొరల తెలంగాణ కావాలా.. ప్రజల తెలంగాణ కావాలా'
BRS Fires on PM Modi Statements in BC Public Meeting :మరోవైపు నరేంద్ర మోదీ (PM Narendra Modi) బీసీ సీఎం వ్యాఖ్యలపై బీఆర్ఎస్ నేతలు మండిపడ్డారు. నిన్నటి దాకా మత రాజకీయం చేశారని.. ఇక ఇప్పుడు కుల రాజకీయానికి తెర తీశారని ఆరోపించారు. పది సంవత్సరాల భారతీయ జనతా పార్టీ పాలనలో.. బీసీలకు మిగిలింది వేదన మాత్రమేనని అన్నారు. బీసీల జనగణన కూడా చేయని పాలన బీజేపీది అని.. కేంద్రంలో బీసీ మంత్రిత్వ శాఖను పెట్టని ప్రభుత్వం.. బీజేపీ సర్కార్ అంటూ కేటీఆర్ ఆక్షేపించారు.
KTR Comments on PM Modi : అందుకే బీజేపీ ముమ్మాటికీ బీసీల వ్యతిరేక పార్టీయేనని కేటీఆర్ (KTR)పేర్కొన్నారు. బీసీలంటే ఆ పార్టీ దృష్టిలో బలహీనవర్గాలు.. కానీ, తమకు బీసీలంటే బలమైన వర్గాలని ప్రధానిమంత్రికి తెలియదని అన్నారు. రాష్ట్రంలోని బీసీలకు పదవులే కాదు.. అనేక పథకాలిచ్చిన ప్రభుత్వం బీఆర్ఎస్ది అని కేటీఆర్ ట్వీట్ చేశారు.