ఏపీలో సున్నా వడ్డీ పథకానికి రూ. 1400 కోట్లు

ఆంధ్రప్రదేశ్​లో ఉన్న స్వయం సహాయక సంఘాల మహిళలకు రుణమాఫీని నాలుగు విడతలుగా ఏపీ ప్రభుత్వం చెల్లించనుంది. 'వైఎస్సార్​ సున్నా వడ్డీ పథకం' కింద వడ్డీ చెల్లించేందుకు రూ.1400 కోట్లు విడుదల చేయనుంది. ఈ పథకాన్ని ఏప్రిల్​ 24న లాంఛనంగా ప్రారంభించనుంది.

ఏపీలో స్వయం సహాయక సంఘాల మహిళలు బ్యాంకు లింకేజీ ద్వారా తీసుకున్న రుణాలకు 'వైఎస్సార్​ సున్నా వడ్డీ పథకం' కింద వడ్డీ చెల్లించేందుకు ఆంధ్రా ప్రభుత్వం రూ. 1400 కోట్లు విడుదల చేయనుంది. ఆ మేరకు రూ. 765 కోట్ల విడుదలకు అనుమతిస్తూ ఆదివారం ఉత్తర్వులు జారీ చేసింది. ఏప్రిల్​ 24న పథకాన్ని లాంఛనంగా ప్రారంభించనున్నారు. గ్రామీణ ప్రాంతాల్లోని 6.9 లక్షల సంఘాల్లోని మహిళలకు రూ. 1000 కోట్లు, పట్టణ ప్రాంతాల్లోని 1.8 లక్షల సంఘాల్లోని మహిళలకు రూ. 400 కోట్లు చెల్లించనున్నారు.

ఆంధ్రప్రదేశ్​ సీఎం జగన్​ ఎన్నికల ప్రణాళికలో ఇచ్చిన హామీ మేరకు రాష్ట్రవ్యాప్తంగా ఉన్న సంఘాలకు రూ. 24,603 కోట్లు రుణాన్ని మాఫీ చేయాల్సి ఉంది. ఈ మొత్తాన్ని నాలుగు విడతలుగా చెల్లిస్తామని ప్రకటించింది. అప్పటి వరకు ఆరు నెలలకు ఒకసారి వడ్డీని లబ్దిదారుల ఖాతాల్లో జమ చేస్తామని తెలిపింది. ఈ మేరకు గత ఆర్థిక సంవత్సరానికి (2019-20) సంబంధించి రెండు విడతల ( గత ఏప్రిల్​ నుంచి ఈ ఏడాది మార్చి వరకు) మొత్తం రూ. 1400 కోట్లు కానున్నట్లు ఏపీ గ్రామీణ పేదరిక నిర్మూలన సొసైటీ (సెర్ప్​) సీఈవో రాజబాబు తెలిపారు.

ఇవీచూడండి:పోలీసులను చూసి భయమేసింది... కొత్తిమీర రోడ్డు పాలైంది