పంజాగుట్టలో వ్యాపారి మృతిపై దర్యాప్తునకు ప్రత్యేక బృందాలు

పంజాగుట్ట వేంకటేశ్వర స్వామి ఆలయం సమీపంలో శనివారం  దాడికి గురైన వ్యాపారి రామ్​ప్రసాద్​ ఇవాళ మృతి చెందారు. యశోద ఆస్పత్రితో చికిత్స పొందుతూ అర్ధరాత్రి తుదిశ్వాస విడిచారు. రామ్​ప్రసాద్​ను కోగంటి సత్యమే హత్యచేయించినట్లు కుటుంబ సభ్యులు ఆరోపిస్తున్నారు. ఈ ఘటనపై విచారణకు ప్రత్యేక బృందాలను నియమించినట్లు డీసీపీ శ్రీనివాస్​ తెలిపారు.

హైదరాబాద్​ పంజాగుట్టలో శనివారం దాడికి గురైన వ్యాపారి రామ్​ప్రసాద్​ ఆస్పత్రిలో చికిత్స పొందుతూ ఇవాళ మృతిచెందారు. విచారణకు పంజాగుట్ట ఏసీపీ ఆధ్వర్యంలో ప్రత్యేక బృందాలను ఏర్పాటు చేశారు.

అసలేం జరిగిందంటే..

పంజాగుట్టలోని వేంకటేశ్వర స్వామి ఆలయం సమీపంలో శనివారం దైవ దర్శనం చేసుకొని బయటకు వచ్చిన రామ్​ప్రసాద్​పై ముగ్గురు వ్యక్తులు హత్యాయత్నం... చేసి అక్కడి నుంచి పరారయ్యారు. తీవ్ర గాయాలపాలైన బాధితున్ని స్థానికులు సోమాజిగూడలోని యశోద ఆస్పత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని క్లూస్​ టీంతో ఆధారాలు సేకరించారు. క్షతగాత్రుడు గచ్చిబౌలిలో స్టీల్​ వ్యాపారం చేస్తున్నట్లు పోలీసులు తెలిపారు. రామ్​ప్రసాద్​ డ్రైవర్​ను అదుపులోకి తీసుకొని ప్రశ్నిస్తున్నారు. వ్యాపార లావాదేవీలే దాడికి దారి తీశాయా అనే కోణంలో విచారణ చేస్తున్నారు.

హత్య రూ. 50 కోట్ల కోసమేనా..!

వ్యాపారి రామ్​ప్రసాద్​ను కోగంటి సత్యం హత్య చేయించారని మృతుని కుటుంబ సభ్యులు ఆరోపిస్తున్నారు. నెల రోజుల నుంచి బెదిరింపులు వస్తున్నట్లు తెలిపారు. తనకు రావాల్సిన రూ.50 కోట్లను కోగంటి సత్యం ఇవ్వడం లేదని విజయవాడ కృష్ణలంక పోలీసులకు రామ్​ప్రసాద్​ ఇదివరకే ఫిర్యాదు చేసినట్లు కుటుంబ సభ్యులు తెలిపారు.

విచారణకు ప్రత్యేక బృందాలు

రామ్​ప్రసాద్​ హత్యపై పోలీసులు దర్యాప్తు ముమ్మరం చేశారు. విచారణకు పంజాగుట్ట ఏసీపీ ఆధ్వర్యంలో ప్రత్యేక బృందాలను ఏర్పాటు చేసినట్లు పశ్చిమ మండల డీసీపీ శ్రీనివాస్​ తెలిపారు.

ఇవీ చూడండి: అనుమానాస్పద స్థితిలో దంపతులు మృతి