Vanama Raghavendra Rao: కొత్తగూడెం శాసనసభ్యుడు వనమా వెంకటేశ్వరరావు కుమారుడు, తెరాస నేత రాఘవేంద్ర రావు వివాదాలకు కేంద్రంగా మారాడు. ఇప్పటికే అనేక కేసుల్లో ఆయన ఆరోపణలు ఎదుర్కొంటుండగా... తాజాగా పాల్వంచ ఘటన రాష్ట్రవ్యాప్తంగా చర్చనీయంగా మారింది. పాల్వంచ గ్రామీణం, పట్టణ పోలీస్ స్టేషన్‌లో ఇప్పటి వరకు ఆయనపై మొత్తం 6 కేసులు నమోదయ్యాయి. పలువురి ఆత్మహత్యలకు సంబంధించి రాఘవేంద్రరావు తీవ్ర ఆరోపణలు ఎదుర్కొంటున్నారు. జ్యోతి అనే గిరిజన మహిళకు చెందిన స్థలవివాదంలో రాఘవేంద్రరావు అనుచరులు ఆమెపై భౌతికదాడికి పాల్పడ్డారు. ఎస్టీ మహిళపై హత్యాయత్నం విషయంలో ప్రధాన ఆరోపణలు ఎదుర్కొనగా... ఈ కేసు ఎస్సీ, ఎస్టీ కమిషన్ వరకు వెళ్లటం గతంలో సంచలనం రేపింది.
పాల్వంచకు చెందిన ఫైనాన్స్ వ్యాపారి వెంకటేశ్వర్లు ఆత్మహత్య కేసులో రాఘవేంద్రరావు ఏ-1 ఆరోపణలు ఎదుర్కొన్నారు. దాదాపు 20 రోజుల పాటు అజ్ఞాతంలోకి వెళ్లి, హైకోర్టులో స్క్వాష్ పిటిషన్ దాఖలు చేసి మళ్లీ కేసు నుంచి బయటపడ్డారు. ఇవే కాకుండా నియోజకవర్గాన్ని తన కనుసన్నల్లో నడిపిస్తారన్న విమర్శలు ఆది నుంచీ ఎదుర్కొంటున్నారు. పార్టీని, అధికార యంత్రాంగాన్ని తన గుప్పిట్లో పెట్టుకుని పెత్తనం చెలాయిస్తారని ఆరోపణలున్నాయి. వ్యక్తిగత పంచాయతీల నుంచి భూవివాదాలు, సెటిల్మెంట్లలో రాఘవ జోక్యంతో అనేక వివాదస్పద ఘటనలో వెలుగులోకి వచ్చాయి.
తాజాగా పాల్వంచలో నాగ రామకృష్ణ కుటుంబం ఆత్మహత్య కేసులోనూ రాఘవ ఏ-2గా ఉండటం అటు రాజకీయంగానూ దుమారం చెలరేగుతోంది. నిందితుడిని వెంటనే అరెస్టు చేయాలని ప్రతిపక్ష నేతలు డిమాండ్ చేస్తున్నారు. రాఘవేంద్రరావు అరాచకాలకు పోలీసులు పట్టించుకోనందునే ఇప్పుడొక కుటుంబం ప్రాణాలు తీసుకుందని సీఎస్పీ నేత భట్టి మండిపడ్డారు. ఎంతో మంది ఆత్మహత్యలకు కారకుడైన రాఘవను కఠినంగా శిక్షించాలని భద్రాచలం ఎమ్మెల్యే పొదెం వీరయ్య డిమాండ్ చేశారు.