విశ్వరూప సేవకు సిద్ధమైన భద్రాద్రి ఆలయం..

సీతారామచంద్ర స్వామి ఆలయంలో నేడు సాయంత్రం జరిగే విశ్వరూప సేవకు సర్వం సిద్ధమైంది. శ్రీ వైకుంఠ ఏకాదశి అధ్యయనోత్సవాలలో చివరిది, పెద్దది అయిన విశ్వరూప సేవ.. ఇవాళ సాయంత్రం అంగరంగ వైభవంగా నిర్వహించనున్నారు.

భద్రాద్రి కొత్తగూడెం జిల్లా భద్రాచలంలోని శ్రీ సీతారామచంద్ర స్వామి ఆలయంలో ఇవాళ సాయంత్రం విశ్వరూప సేవ వైభవంగా జరగనుంది. దీని కోసం ఆలయ అధికారులు బేడా మండపం వద్ద అన్ని ఏర్పాట్లు చేస్తున్నారు. భద్రాచలంలో నిర్వహించిన శ్రీ వైకుంఠ ఏకాదశి అధ్యయనోత్సవాలలో చివరిది, పెద్దది అయిన విశ్వరూప సేవ ఘనంగా నిర్వహించనున్నారు.

ముక్కోటి ఏకాదశి ఉత్సవాలలో రోజుకో అవతారంలో దర్శనమిచ్చిన ఉత్సవమూర్తులు, ఒక్కొక్క వాహనంపై వేంచేసి ఒకేసారి భక్తులకు దర్శనం ఇస్తారు. ముక్కోటి ఏకాదశి రోజు ఎవరైతే ద్వార దర్శనం చూడకుండా ఉంటారో, విశ్వరూప సేవ రోజు ఈ ఉత్సవాన్ని చూడడం వల్ల అంతటి ఫలితం కలుగుతుందని ఆలయ అర్చకులు తెలుపుతున్నారు.

దంపతులకు వెయ్యి రూపాయల ప్రత్యేక టిక్కెట్

ఈ రోజు జరిగే ప్రత్యేక పూజల కోసం ప్రత్యేక టికెట్లను ఆలయ అధికారులు కేటాయించారు. దంపతులకు వెయ్యి రూపాయల చొప్పున టిక్కెట్ ధరను నిర్ణయించారు. పూజలో పాల్గొన్న వారికి శేష వస్త్రాలు, స్వామివారి ప్రసాదం అందజేస్తారు.

ఇదీ చూడండి: తీరని దుఃఖం: తీగపై దుస్తులు ఆరేస్తూ.. నలుగురు దుర్మరణం