ఆదిలాబాద్‌ జిల్లా ఇచ్చోడ వ్యవసాయ డివిజన్‌ కేంద్రంగా శనగల కుంభకోణం చోటుచేసుకుంది. రైతులకు ఉచితంగా పంపిణీ చేయాల్సిన లక్షలాది రూపాయలు విలువ గల శనగలను కొంతమంది అధికారులు ప్రైవేటులో విక్రయించుకుని సొమ్ముచేసుకున్నారు. ఇటీవల హైదరాబాద్‌ నుంచి వచ్చిన అధికారుల బృందం నిర్వహించిన తనిఖీల్లో ఈ వ్యవహారం వెలుగులోకి వచ్చింది. బాధ్యులైన అధికారులు ఈ కుంభకోణం బయటకు రాకుండా ఉండేందుకు తనిఖీలకు వచ్చినవారిని ప్రసన్నం చేసుకునేందుకు అన్ని రకాలైన చర్యలు తీసుకున్నట్లు సమాచారం. ఉన్నతాధికారులు జోక్యం తీసుకుని... అప్పటి అధికారులను విచారిస్తే అసలు కథ బయటపడే అవకాశం ఉంది.
జరిగిందేమిటీ..?
2019-20 ఖరీఫ్‌ కాలానికి జాతీయ ఆహార పథకం (ఎన్‌ఎఫ్‌ఎస్‌ఎం) కింద ఇచ్చోడ వ్యవసాయ డివిజన్‌కు 16 కిలోలకు ఒక కిట్‌ చొప్పున (దాదాపుగా 300 కిట్లు) శనగల కేటాయింపు జరిగింది. అంటే 4800 కిలోల శనగలన్నమాట. ఒక్కో కిలోకు రూ. 56 చొప్పున పరిగణలోకి తీసుకుంటే రూ 2.68లక్షల విలువ చేసే శనగలను ఇచ్చోడ డివిజన్‌లోని తొమ్మిది మండలాల రైతులకు ఉచితంగా పంపిణీ చేయాల్సి ఉంది. కానీ అప్పటి డివిజన్‌స్థాయి అధికారితో పాటు ఒకరిద్దరు జిల్లాస్థాయి అధికారులు రైతులకు పంపిణీ చేకుండానే... చేసినట్లు నివేదికలు తయారుచేసి ప్రైవేటులో అమ్ముకోవడం సొంతశాఖ అధికారవర్గాల్లోనే చర్చనీయాంశమైంది.
జిల్లాకు విత్తన కిట్లు వచ్చిన మాట వాస్తవమేనన్న జిల్లా వ్యవసాయాధికారి...
జిల్లాకు ఎన్‌ఎఫ్‌ఎస్‌ఎం పథకం కింద శనగల కిట్లు వచ్చిన మాట వాస్తవమే. జిల్లా వ్యవసాయాధికారి ఆశాకుమారి అంగీకరించారు. హైదరాబాద్‌ నుంచి వచ్చిన అధికారులు తనిఖీలు నిర్వహించారన్నారు. తనిఖీలు సాధారణమైనవేనని తెలిపారు. ఇచ్చోడ డివిజన్‌కు కేటాయించిన విత్తనాలను రైతులకు పంపిణీ చేయాలని అప్పటి ఏడీఏ, ఏవోలకు సూచించామని తెలిపారు. ఆ దస్త్రంపై తాను సంతకం చేశానా? లేదా? అనేది చూడాల్సి ఉందని పేర్కొన్నారు. ఈ ఘటనపై సమగ్ర వివరాలను తెలుసుకుంటానని తెలిపారు. రైతుల వారీగా నివేదికలను పరిశీలించి అక్రమాలు జరిగితే ప్రభుత్వానికి నివేదిస్తామని వెల్లడించారు.