యూఎస్​ ఓపెన్​ నుంచి మరో స్టార్ ప్లేయర్ ఔట్

కరోనా కేసులు ఎక్కువవుతున్న ఇలాంటి సమయంలో ప్రయాణం చేయడం సరికాదని, అందుకే యూఎస్ ఓపెన్​ నుంచి తప్పుకుంటున్నట్లు నాదల్ స్పష్టం చేశాడు.

ప్రపంచవ్యాప్తంగా కరోనా వ్యాప్తి పెరుగుతున్న కారణంగా యూఎస్​ ఓపెన్​ నుంచి తప్పుకుంటున్నట్లు డిఫెండింగ్​ ఛాంపియన్​ రఫెల్​ నాదల్ ట్విట్టర్​లో ప్రకటించాడు. ఫలితంగా గ్రాండ్​స్లామ్​ టైటిల్స్​లో రోజర్​ ఫెదరర్​ను సమం చేసే అవకాశాన్ని వచ్చే ఏడాదికి నాదల్ వాయిదా వేసుకోవాల్సి వచ్చింది. ​

"ప్రపంచవ్యాప్తంగా పరిస్థితి చాలా క్లిష్టంగా ఉంది. కొవిడ్​ కేసులు విపరీతంగా పెరిగిపోతున్నాయి. వైరస్​పై ఇంకా నియంత్రణ రాలేదని అనిపిస్తుంది. ఈ సమయంలో యూఎస్​ ఓపెన్​ కోసం ప్రయాణం చేయలేను" అని నాదల్​ రాసుకొచ్చాడు. ఇప్పటికే ఈ టోర్నీకి వెళ్లట్లేదని ఆస్ట్రేలియాకు చెందిన ప్రపంచ నంబర్​.1 ర్యాంకర్ యాష్​ బార్టీ చెప్పింది.