ప్రపంచ దేశాలు కరోనాతో వణికిపోతున్నాయి. అన్ని రంగాలతో పాటు క్రీడారంగాన్ని కుదిపేసిందీ మహమ్మారి. ఫలితంగా ప్రతిష్టాత్మక టోక్యో ఒలింపిక్స్ వాయిదాపడ్డాయి. అయితే... ఈ ఏడాది ఒలింపిక్స్ జరిగితే పసిడి పతకాలతో సత్తాచాటుదామనుకున్న దిగ్గజాలు.. మరో సంవత్సరం పాటు ఫిట్‌నెస్‌ కాపాడుకుంటూ ఈ మెగా క్రీడలకు సన్నద్ధం కావాల్సిన పరిస్థితి తలెత్తింది. ఇది వాళ్లకు పెద్ద సవాలే. మరి ఆ క్రీడాకారులెవరో చూద్దాం.
ట్రాక్‌ చిరుతలు..
ఆరు ఒలింపిక్‌ స్వర్ణాలు నెగ్గిన ఏకైక మహిళా ట్రాక్‌ అండ్‌ ఫీల్డ్‌ అథ్లెట్‌గా చరిత్ర నమోదు చేసిన అమెరికా స్ప్రింటర్‌ ఎలిసన్‌ ఫెలిక్స్ టోక్యో క్రీడల్లోనూ బంగారు పతకాలు నెగ్గి తన కెరీర్‌కు అద్భుతంగా ముగించాలనుకుంటోంది. ఈ నవంబర్‌లో 36వ వసంతంలోకి అడుగుపెట్టబోతున్న ఆమె వరుసగా అయిదోసారి ఒలింపిక్స్‌లో పాల్గొనబోతుంది.
టోక్యో ఒలింపిక్స్ తర్వాత కెరీర్‌కు గుడ్‌బై చెబుదామనుకున్న అమెరికా రన్నర్‌ జస్టిన్‌ గాట్లిన్ మరో ఏడాది ఆగాల్సి వస్తోంది. 38 ఏళ్ల గాట్లిన్ 2004 ఏథెన్స్‌ ఒలింపిక్స్ 100మీ. పరుగులో ఛాంపియన్‌గా నిలిచాడు. 40వ ఏట ఒలింపిక్స్‌లో పరుగెత్తడం గాట్లిన్‌కు కష్టమైన పనే.
రోజర్ ఫెదరర్
20 గ్రాండ్‌స్లామ్‌ టైటిళ్ల ఛాంపియన్‌ రోజర్ ఫెదరర్‌కు ఈ ఆగస్టుకు 39 ఏళ్లు నిండుతాయి. టోక్యో క్రీడల్లో పసిడి పతకంతో తన ఒలింపిక్‌ కెరీర్‌కు గుడ్‌బై చెబుదామనుకున్న అతడు దానికోసం తీవ్రంగా పోరాడక తప్పని పరిస్థితి నెలకొంది. మరో ఏడాది పాటు తన ఫిట్‌నెస్‌ను కాపాడుకుంటూ.. మంచి ఫామ్‌ను కొనసాగించాలి. ఇప్పటివరకూ అతను సింగిల్స్‌లో ఒలింపిక్‌ స్వర్ణాన్ని గెలవలేకపోయాడు.
2008 బీజింగ్‌ ఒలింపిక్స్‌లో స్టాన్‌ వావ్రింకాతో కలిసి పురుషుల డబుల్స్‌లో బంగారు పతకం గెలిచిన అతడు.. 2012 లండన్‌ క్రీడల్లో సింగిల్స్‌లో రజతం నెగ్గాడు. గాయం కారణంతో 2016 రియో ఒలింపిక్స్‌కు దూరమయ్యాడు. 2000 సిడ్నీ ఒలింపిక్స్‌లో సెమీస్‌ వరకూ వెళ్లగలిగిన అతడికి ఆ క్రీడల్లో పతకమైతే దక్కలేదు కానీ తన భార్య మిర్కా అప్పుడే పరిచయమైంది.
సెరెనా విలియమ్స్‌
ఇప్పటికే నాలుగు ఒలింపిక్‌ స్వర్ణాలు ఖాతాలో వేసుకున్న మహిళల టెన్నిస్‌ దిగ్గజం సెరెనా విలియమ్స్‌ మరోసారి పోడియంపై నిల్చోవాలనే పట్టుదలతో ఉంది. ఇటీవల ఆమె ఫామ్‌ గొప్పగా లేకపోయినప్పటికీ ఒలింపిక్స్‌లో మాత్రం తనదైన శైలిలో చెలరేగాలనే ఆశలు పెట్టుకుంది.