సెల్ఫ్ ఐసోలేషన్​ను అతిక్రమించి క్లబ్​లో చిందులు

ఆడ్రియా టూర్​లో పాల్గొన్న టెన్నిస్ ఆటగాళ్లు జకోవిచ్​తో సహా పలువురికి కరోనా పాజిటివ్​గా తేలింది. దీంతో ఈ టోర్నీకి హాజరైన మిగతా ఆటగాళ్లు సెల్ఫ్ ఐసోలేషన్​లో ఉండాలని అధికారులు కోరారు. కానీ ఈ మాటల్ని పెడచెవిన పెట్టి క్లబ్​కు వెళ్లి విమర్శల పాలయ్యాడు జర్మనీకి చెందిన జ్వెరెవ్.

కరోనా కారణంగా క్రీడా టోర్నీలన్నీ వాయిదా పడ్డాయి. ఇటీవలే లాక్​డౌన్ సడలింపుల్లో భాగంగా కొన్ని దేశాల్లో టోర్నీలు పునఃప్రారంభం అవుతున్నాయి. ఇందులో భాగంగా ఓ ఎగ్జిబిషన్​ టోర్నీలో టెన్నిస్ ఆటగాడు నొవాక్ జకోవిచ్​తో​ పాటు పలువురు పాల్గొన్నారు. కానీ వీరి దురదృష్టవశాత్తు ఈ టోర్నీకి హాజరైన కొంతమందికి కరోనా సోకింది. ఇందులో జకోవిచ్ కూడా ఉన్నాడు. అయితే మిగతా ఆటగాళ్లందూ స్వీయ నిర్బంధంలో ఉండాలని కోరారు అధికారులు. కానీ ఓ ఆటగాడు మాత్రం ఈ రూల్స్​ని ఖాతరు చేయలేదు.

జర్మనీకి చెందని అలెగ్జాండర్‌ జ్వెరెవ్‌ సెల్ఫ్ ఐసోలేషన్​ను అతిక్రమించి పార్టీ చేసుకున్నాడు. ఒక క్లబ్‌లో ఎంచక్కా ఆడిపాడుతూ కనిపించాడు. ఈ ఫొటోలు, వీడియోలు నెట్టింట వైరల్​గా మారాయి. ఫలితంగా విమర్శల పాలయ్యాడు. ఆడ్రియా టూర్​లో పాల్గొనందుకు ప్రజలకు, అభిమానులకు క్షమాపణలు చెప్పి సెల్ఫ్‌ ఐసోలేషన్‌లో ఉంటానన్న జ్వెరెవ్‌.. ఏకంగా క్లబ్‌లోనే సందడి చేయడం పట్ల సహ ఆటగాళ్లతో పాటు ఫ్యాన్స్​ ఆగ్రహం వ్యక్తం చేస్తున్నారు.

ఆడ్రియా టూర్​లో పాల్గొన్న జకోవిచ్​తో పాటు గ్రిగర్‌ దిమిత్రోవ్‌ (బల్గేరియా), క్రొయేషియా ఆటగాడు బోర్నా చోరిచ్, నొవాక్‌ ఫిట్‌నెస్‌ కోచ్‌ మార్కో పానిచిలకు కరోనా పాజిటివ్​గా తేలింది. దీనిపై విచారం వ్యక్తం చేశాడు జకో.