టెన్నిస్​ దిగ్గజం రోజర్​ ఫెదరర్​ సంచలన నిర్ణయం

19:03 September 15

టెన్నిస్​ దిగ్గజం రోజర్​ ఫెదరర్​ సంచలన నిర్ణయం

Roger Federer Announces Retirement : దిగ్గజ టెన్నిస్​ స్టార్​ రోజర్​ ఫెదరర్​ రిటైర్మెంట్​ ప్రకటించాడు. వచ్చే వారం జరగనున్న లావర్​ కప్​ తనకు చివరి ఏటీపీ ఈవెంట్​ అని ట్విట్టర్​లో వెల్లడించాడు 41 ఏళ్ల స్విస్​ దిగ్గజం. 20 గ్రాండ్​స్లామ్​ టైటిళ్లు గెలిచి దిగ్గజ ఆటగాడిగా కీర్తి గడించాడు రోజర్​. కొంతకాలంగా గాయాలతో సతమతమవుతున్న ఫెదరర్​.. 2021 జులైలో జరిగిన వింబుల్డన్​ తర్వాత ఏ టోర్నీలోనూ ఆడలేదు. గ్రాండ్​స్లామ్​ల్లో ఒకటైన యూఎస్​ ఓపెన్ ముగిసిన కొద్దిరోజులకే ప్రొఫెషనల్​ టెన్నిస్​ నుంచి తప్పుకుంటున్నట్లు ప్రకటన చేసి అభిమానులకు షాకిచ్చాడు ఫెదరర్​. 310 వారాల పాటు టెన్నిస్‌లో ప్రపంచ నంబర్‌ వన్‌ ఆటగాడిగా ఉన్నాడు. తన 24 ఏళ్ల కెరీర్​లో 1500కుపైగా మ్యాచ్​లు ఆడానని చెప్పుకొచ్చాడు.

ఇటీవల జరిగిన యూఎస్​ ఓపెన్​ తనకు చివరిదని ఇప్పటికే ప్రకటించింది అమెరికా టెన్నిస్​ స్టార్​, దిగ్గజం సెరెనా విలియమ్స్​. కానీ టైటిల్​ గెలవలేకపోయింది. 23 గ్రాండ్‌స్లామ్‌ విజయాలతో ఓపెన్‌ శకంలో సింగిల్స్‌లో (మహిళలు, పురుషులు కలిపి) అత్యధిక టైటిళ్లు గెలిచిన ప్లేయర్‌గా చరిత్ర సృష్టించిన సెరెనాకు ఓ లోటు మిగిలిపోయింది. టెన్నిస్‌ చరిత్రలోనే అత్యధిక విజయాలతో అగ్రస్థానంలో ఉన్న మార్గరెట్‌ కోర్ట్​ను (24) అందుకోవాలన్న ఆమె కల తీరలేదు. ఇప్పటివరకు ​మహిళల సింగిల్స్‌లో 23, డబుల్స్‌లో 14, మిక్స్‌డ్‌ డబుల్స్‌లో 2 గ్రాండ్‌స్లామ్‌ టైటిళ్లు, నాలుగు ఒలింపిక్‌ స్వర్ణాలతో శిఖరాగ్రానికి చేరుకుంది సెరెనా.
సెరెనా తర్వాత అత్యధిక గ్రాండ్​స్లామ్​లు నెగ్గిన వారిలో ప్రస్తుతం స్పెయిన్​ బుల్​ రఫెల్​ నాదల్​(22), సెర్బియా దిగ్గజం నొవాక్​ జకోవిచ్​(21) వరుసగా ఉన్నారు.