భారత ప్రముఖ రెజ్లర్ సుశీల్ కుమార్తో పాటు అతని అనుచరుడు అజయ్ పోలీస్ కస్టడీని మరో నాలుగు రోజులు పెంచుతూ దిల్లీ కోర్టు అనుమతిచ్చింది. తొలుత మే 23న ఆరు రోజుల రిమాండ్కు అంగీకరించింది న్యాయస్థానం. అనంతరం సుశీల్ను కోర్టులో ప్రవేశపెట్టారు పోలీసులు.
ప్రతి 24 గంటలకు ఒకసారి సుశీల్కు వైద్యపరీక్షలు నిర్వహించాలని పోలీసులను ఆదేశించింది న్యాయస్థానం. రిమాండ్ సమయంలో సుశీల్ న్యాయవాది అతన్ని కలిసేందుకు అనుమతినిచ్చింది. సుశీల్తో పాటు అజయ్ను విచారించడానికి మరో 7 రోజులు కావాలని పోలీసులు దిల్లీ కోర్టును కోరారు. అందుకు నిరాకరించింది న్యాయస్థానం.
సుశీలే ప్రధాన సూత్రధారి..
సాగర్ రానా హత్య కేసులో రెజ్లర్ సుశీల్ కుమారే ప్రధాన సూత్రధారి అని ప్రాసిక్యూషన్ కోర్టుకు వెల్లడించింది. "యువ రెజ్లర్ హత్య కేసులో సుశీలే ప్రధాన సూత్రధారి. అతడే ప్రధాన నిందితుడు. గత ఆరు రోజులుగా కస్టడీలో ఉన్న సుశీల్, అజయ్.. పోలీసులకు సహకరించట్లేదు. పైగా వారిని చాలా ఇబ్బంది పెట్టారు. అందుకే మరోసారి కస్టడీని కోరాల్సి వచ్చింది" అని తెలిపింది.
"గొడవ సమయంలో తాను అక్కడే ఉన్నట్లు, తర్వాత అక్కడి నుంచి ఇంటికి వెళ్లి పడుకున్నట్లు సుశీల్ విచారణలో ఒప్పుకొన్నాడు. అతని నుంచి లైసెన్స్ ఉన్న ఓ పిస్టోల్ను స్వాధీనం చేసుకున్నారు పోలీసులు. ఈ హత్య కేసులో మొత్తం 18-20 నుంచి పాత్ర ఉన్నట్లు గుర్తించారు. ఇప్పటికీ కేవలం 8 మందిని మాత్రమే అరెస్టు చేశారు" అని కోర్టుకు వాదనలు వినిపించారు. సుశీల్ నుంచి మరికొంత సమాచారం కోసం ఏడు రోజుల రిమాండ్ కావాలని పోలీసులు కోరారు. కానీ అందుకు న్యాయస్థానం తిరస్కరించింది.
ఇదీ చదవండి:Sushil Kumar: గ్యాంగ్‌స్టర్లతో సంబంధాలపై మౌనం
