ఈఎస్పీఎన్ ఇండియా సంస్థ క్రీడా అవార్డులను ప్రకటించింది. 2018 సంవత్సరంలో వివిధ క్రీడాంశాల్లో సత్తా చాటిన భారత క్రీడాకారులను అవార్డులతో సత్కరించింది. పురుషుల్లో ఈ ఏటి మేటి ఆటగాడిగా 'జావెలిన్ త్రో' ఆటగాడు నీరజ్ చోప్రా ఎంపికయ్యాడు. మహిళల్లో బ్యాడ్మింటన్ క్రీడాకారిణి పీవీ సింధు అవార్డు సాధించింది.
2018లో అద్భుత ప్రదర్శన చేసిన సింధు.. చివర్లో బీడబ్ల్యూఎఫ్ వరల్డ్ టూర్ ఫైనల్స్ టైటిల్ సాధించింది.ప్రపంచ ఛాంపియన్ షిప్లోనూ ఆకట్టుకునే ప్రదర్శన చేసింది. నీరజ్ చోప్రా ఆసియా, కామన్వెల్త్ క్రీడల్లో బంగారు పతకాన్ని గెలిచాడు. అంతే కాకుండా జావెలిన్ త్రో లో 88.06 మీటర్ల దూరం బల్లెం విసిరి జాతీయ రికార్డు నమోదు చేశాడు. పునరాగమన క్రీడాకారిణిగా (కమ్ బ్యాక్ ఆఫ్ ది ఇయర్) సైనా నెహ్వాల్ ఎంపికైంది.
ఈఎస్పీఎన్ ఇండియా అవార్డులు టీమ్ ఆఫ్ ది ఇయర్ (ఈ ఏటి మేటి జట్టు)గా భారత మహిళా టేబుల్ టెన్నిస్ జట్టు ఎంపికైంది. కామన్వెల్త్ క్రీడల్లో బంగారు పతకం సాధించిందీ జట్టు. ప్రముఖ ఫుట్బాల్ ఆటగాడు ప్రదీప్ కుమార్ బెనర్జీకి జీవన సాఫల్య పురస్కారం దక్కింది.
అవార్డు విజేతలు:
- స్పోర్ట్స్ పర్సన్ ఆఫ్ ది ఇయర్ పురుషుల్లో(ఈ ఏటి మేటి క్రీడాకారుడు).. నీరజ్ చోప్రా(అథ్లెటిక్స్)
- స్పోర్ట్స్ పర్సన్ ఆఫ్ ది ఇయర్ మహిళల్లో(ఈ ఏటి మేటి క్రీడాకారిణి).. పీవీ సింధు(బ్యాడ్మింటన్)
- కమ్ బ్యాక్ ఆఫ్ ది ఇయర్ (పునరాగమన క్రీడాకారిణి)....... సైనా నెహ్వాల్(బ్యాడ్మింటన్)
- కోచ్ ఆఫ్ ది ఇయర్ (ఈ ఏటి మేటి శిక్షకుడు)........ జస్పాల్ రానా(షూటింగ్)
- ఎమర్జింగ్ స్పోర్ట్స్ పర్సన్ ఆఫ్ ది ఇయర్............ సౌరభ్ చౌదరి (షూటింగ్)
- టీమ్ ఆఫ్ ది ఇయర్ (ఈ ఏటి మేటి జట్టు)....... భారత మహిళల టేబుల్ టెన్నిస్ జట్టు
- మ్యాచ్ ఆఫ్ ది ఇయర్............ అమిత్ పంగాల్- హసన్బాయ్ దస్మాతోవ్ (బాక్సింగ్)
- డిఫరెంట్లీ ఏబుల్డ్ అథ్లెట్ ఆఫ్ ది ఇయర్........ ఏక్తా బ్యాన్ (పారా అథ్లెటిక్స్)
- మూమెంట్ ఆఫ్ ది ఇయర్......... మహిళల 4x400 మీటర్ల రిలే
- జీవన సాఫల్య పురస్కారం................... ప్రదీప్ కుమార్ బెనర్జీ(ఫుట్బాల్)
