ఒలింపిక్స్​ రద్దు చేయలేం: థామస్​ బాచ్​

టోక్యో ఒలింపిక్స్​-2020ను ఎట్టి పరిస్థితుల్లో రద్దు చేయమని అంతర్జాతీయ ఒలింపిక్​ కమిటీ అధ్యక్షుడు థామస్​ బాచ్​ స్పష్టం చేశారు. అయితే క్రీడాకారుల ఆరోగ్యాన్ని దృష్టిలో ఉంచుకుని టోర్నీని వాయిదా వేసే అవకాశం ఉందని తెలిపారు.

టోక్యో ఒలింపిక్స్​ను రద్దు చేయడం జరగదని అంతర్జాతీయ ఒలింపిక్ కమిటీ అధ్యక్షుడు(ఐఓసీ) థామస్​ బాచ్​ ఆదివారం తెలిపారు. అయితే ప్రపంచవ్యాప్తంగా కరోనా నియంత్రణలో భాగంగా టోర్నీని వాయిదా వేసే అవకాశం ఉందని అన్నారు.

"ఒలింపిక్స్​ను రద్దు చేయడం వల్ల ఏ సమస్యలను పరిష్కరించలేం. అందువల్ల టోర్నీని రద్దు చేయడం కుదరదు. ఈ విషయంపై జపాన్​ ప్రభుత్వంతో కలిసి టోర్నీ నిర్వాహక కమిటీ ప్రపంచవ్యాప్తంగా నెలకొన్న పరిస్థితుల ప్రభావాన్ని అంచనా వేస్తుంది. వచ్చే నాలుగు వారాల్లో ఈ విషయంపై ఓ స్పష్టత వస్తుందని ఐఓసీ నమ్మకంగా ఉంది."

- థామస్​ బాచ్​, ఐఓసీ అధ్యక్షుడు

కరోనా నేపథ్యంలో ఒలింపిక్స్ వాయిదా పడే అవకాశాన్ని కొట్టిపారేయలేమని తెలిపారు జపాన్ ప్రధానమంత్రి షింజో అబే. అంతర్జాతీయ ఒలింపిక్ కమిటీ కొన్ని వారాలు పరిస్థితిని పరిశీలించి నిర్ణయం తీసుకుంటుందని అన్నారు.

ఒలింపిక్స్​ను వాయిదా వేయాలని కొన్ని రోజులుగా అంతర్జాతీయ ఒలింపిక్​ కమిటీపై ఒత్తిడి పెరుగుతోంది. ప్రపంచవ్యాప్తంగా కరోనా మరణాలు పెరుగుతున్న క్రమంలో క్రీడాకారుల ఆరోగ్యంపై తీవ్ర ఆందోళన వ్యక్తమవుతోంది.

ఇదీ చూడండి..'మహిళా అథ్లెట్లకు సమాన వేతనాలు ఇవ్వాలి'