ఒలింపిక్ టెస్టు ఈవెంట్ విజేత భారత్

ఒలింపిక్ టెస్టు ఈవెంట్ ఫైనల్లో విజేతగా నిలిచింది భారత పురుషుల హాకీ జట్టు. సెమీస్​లో ఆతిథ్య జపాన్​పై అలవోకగా గెలిచిన భారత ఆటగాళ్లు... టైటిల్​ పోరులోనూ అదే దూకుడు కనబరిచారు. బుధవారం జరిగిన మ్యాచ్​లో న్యూజిలాండ్​పై 5-0 తేడాతో విజయం సాధించారు.

భారత పురుషుల హాకీ జట్టు ఒలింపిక్ టెస్టు​ ఈవెంట్ విజేతగా నిలిచింది. బుధవారం జరిగిన ఫైనల్లో న్యూజిలాండ్​పై 5-0 తేడాతో గెలిచింది. సెమీస్​లో ఆతిథ్య జపాన్​పై సత్తాచాటిన హాకీ టీమిండియా... ఫైనల్లోనూ అదే జోరు కొనసాగించింది.

ఫైనల్లో న్యూజిలాండ్​పై భారత జట్టు విజయం

అదరగొట్టిన భారత ఆటగాళ్లు...

ఏడో నిమిషంలోనే కెప్టెన్ హర్మన్​ప్రీత్ సింగ్ గోల్​తో శుభారంభం అందించాడు. అనంతరం 18 నిమిషంలో షంషేర్​ సింగ్, 22వ నిమిషంలో నీలకంఠ శర్మ, 26వ నిమిషంలో గుర్సబిజిత్ సింగ్, 27వ నిమిషంలో మన్​దీప్​ సింగ్​ గోల్స్​తో ప్రత్యర్థిని వణికించారు.

తొలి అర్ధభాగంలో భారత్​ దూకుడు ప్రదర్శించి ఆధిక్యంలో నిలిచింది. 37వ నిమిషంలో ప్రత్యర్థి జట్టుకు గోల్ చేసే అవకాశమొచ్చినా.. సద్వినియోగం చేసుకోలేకపోయింది. భారత డిఫెన్స్​ను ఛేదించలేక చతికిలపడింది కివీస్​. లీగ్ దశలో 1-2 తేడాతో న్యూజిలాండ్​పై ఓడిన హాకీ ఇండియా... తుదిపోరులో నెగ్గి ఆ పరాభవానికి ప్రతీకారం తీర్చుకుంది.

హాకీ జట్టుకు ఒడిశా సీఎం నవీన్ పట్నాయక్ శుభాకాంక్షలు తెలుపుతూ ట్వీట్ చేశారు. భవిష్యత్తులో మరిన్ని విజయాలు అందుకోవాలని ఆకాంక్షించారు.