World Cup 2023 IND vs PAK : ప్రపంచ క్రికెట్‌ అభిమానులు ఎంతో ఆసక్తిగా ఎదురుచూస్తున్న దాయాదుల పోరుకు సమయం దగ్గరపడుతోంది. ఆక్టోబర్‌ 14న అహ్మదాబాద్‌ వేదికగా భారత్-పాకిస్థాన్ జట్లు తలపడనున్నాయి. అయితే ఈ మ్యాచ్‌ను చూసేందుకు పాకిస్థాన్ క్రికెట్‌ బోర్డు మేనేజ్‌మెంట్ కమిటీ ఛైర్మన్ జకా అష్రఫ్ భారత్కు రానుండటం విశేషం. కాగా ఇప్పటికే ఈ హైవోల్టేజ్‌ మ్యాచ్ కోసం పాకిస్థాన్ జర్నలిస్ట్‌లకు భారత ప్రభుత్వం వీసాలు జారీ చేసిన సంగతి తెలిసిందే.
మొత్తం 60 మంది జర్నలిస్టులతో కలిసి జకా అష్రఫ్ కూడా భారత గడ్డపై అడుగుపెట్టనున్నారు. "నేను గురువారం భారత్కు రానున్నాను. నా జర్నీ కాస్త ఆలస్యమైంది. ఈ మెగా ఈవెంట్‌ను కవర్‌ చేయడానికి పాకిస్థాన్ జర్నలిస్ట్‌లకు వీసాలు ఇచ్చేందుకు భారత ప్రభుత్వం ముందుకు వచ్చింది. వీసాల జారీపై భారత రాయబార కార్యాలయం సానుకూలంగా స్పందించినందుకు ఎంతో సంతోషంగా ఉంది. మా జర్నలిస్టులతో కలిసి భారత్కు వస్తున్నాను. ఈ మెగా టోర్నీలో ఇప్పటివరకు రెండు మ్యాచ్‌ల్లో మా టీమ్ అద్భుతమైన ప్రదర్శన చేసింది. ప్లేయర్ల ప్రదర్శన పట్ల నేను సంతృప్తిగా ఉన్నాను. టీమ్ను ప్రోత్సహించేందుకు నేను భారత్కు వెళ్తున్నాను. భారత్‌తో కీలక మ్యాచ్‌కు ముందు మా జట్టుకు నేను ఇచ్చే సందేశం ఒక్కటే. ఎటువంటి ఒత్తిడి లేకుండా ఆడండి " అని జకా అష్రఫ్ పేర్కొన్నారు.