CSK Chances to win IPL 2022: 2020 ఘోర ఓటమి తర్వాత గతేడాది పడిలేచిన కెరటంలా బలంగా తిరిగొచ్చి నాలుగోసారి ఛాంపియన్‌గా అవతరించింది. ఇప్పుడు జడేజా నేతృత్వంలో ఐదోసారి కప్పు సాధించి ముంబయితో సమానంగా నిలవాలని చూస్తుంటే పరిస్థితులు ప్రతికూలంగా కనిపిస్తున్నాయి. దీంతో ఈ ఏడాది చెన్నై ప్లేఆఫ్స్ చేరుతుందా లేదా అనే అనుమానం మొదలైంది. ఈ నేపథ్యంలో చెన్నై జట్టు పరిస్థితి ఎలా ఉందో తెలుసుకుందాం..
2010లోనూ ఇలాగే.. కానీ..!..చెన్నై 2010లోనూ ఇలాగే ఆరంభంలో తడబడింది. తొలి మూడు మ్యాచ్‌ల తర్వాత వరుసగా నాలుగు మ్యాచ్‌లు ఓటమిపాలైనా చివరికి విజేతగా నిలిచి అందర్నీ ఆశ్చర్యపరిచింది. అప్పుడు.. లీగ్‌ స్టేజ్‌ పూర్తయ్యేసరికి 14 పాయింట్లతో నిలిచింది. ఫైనల్‌కు చేరి తొలిసారి టైటిల్‌ ముద్దాడింది. అక్కడి నుంచి మొదలైన కప్పుల వేట ఇంకా కొనసాగుతోంది. మరి ఇప్పుడు అలాంటి ఫలితమే పునారవృతం చేస్తుందా.. లేదా చూడాలి. అయితే, ఇప్పుడున్న పరిస్థితులు చూస్తుంటే చెన్నై కనీసం ప్లేఆఫ్స్ అయినా చేరుతుందా లేదా అనే అనుమానాలు రేకెత్తుతున్నాయి. వరుసగా నాలుగు ఓటముల అనంతరం ఐదో మ్యాచ్‌లో బెంగళూరుపై విజయం సాధించడంతో ఆశలు చిగురించిన వేళ.. మళ్లీ ఆరో మ్యాచ్‌లో గుజరాత్‌ చేతిలో ఓటమిపాలైంది. ఈ మ్యాచ్‌లో ఆరంభం నుంచీ ఆధిపత్యం చెలాయించినా చివరి క్షణాల్లో పట్టువదిలి మ్యాచ్‌ చేజార్చుకుంది. దీంతో ఇదే ఇప్పుడు ఆ జట్టును కంగారు పెట్టిస్తోంది. ఇలాంటి పరిస్థితుల్లో చెన్నై ఇకపై నెగ్గుకు రావాలంటే మరింత ఎక్కువ శ్రమించాల్సి ఉంది.
ప్లేఆఫ్స్ చేరాలంటే ఎన్ని పాయింట్లు కావాలి?..ఎప్పటిలాగే ఈసారి కూడా ఏ జట్టు అయినా ప్లేఆఫ్స్ చేరాలంటే కచ్చితంగా 14 పాయింట్లు సాధించాలి. ఇతర జట్ల మధ్య పోటీ ఎక్కువగా ఉండటంతో.. 14 పాయింట్లే సాధిస్తానంటే సరిపోదు. ముందే బెర్తు ఖాయం కావాలంటే 16 పాయింట్లు సాధించాలి. అప్పుడు నెట్‌రన్‌ రేట్‌తో సంబంధం లేకుండా టాప్‌లోకి వెళ్లే అవకాశం ఉంది. అయితే, చెన్నై ఇప్పటివరకు ఆడిన ఆరు మ్యాచ్‌ల్లో ఒక్కటే గెలవడంతో కేవలం 2 పాయింట్లతోనే ప్రస్తుతం తొమ్మిదో స్థానంలో కొనసాగుతోంది. అలాంటప్పుడు మిగతా జట్లను దాటి ప్లేఆఫ్స్ చేరాలంటే ఇంకో 14 పాయింట్లు కావాల్సి ఉంది. అంటే ఇకపై ఆడాల్సిన 8 మ్యాచ్‌ల్లో 7 గేమ్‌లు తప్పక గెలవాలి. ఒకవేళ ఆరు గెలిస్తే ఆఖర్లో రన్‌రేట్‌ విషయంలో ఇతర జట్లతో పోటీపడాల్సి ఉంటుంది. కానీ, చెన్నై ప్రస్తుత రన్‌రేట్‌ (-0.638) పరిస్థితి మైనస్‌లో ఉండటంతో అభిమానులకు కాస్త ఆందోళనగానే ఉంది.
చెన్నై బలాబలాలు.. ఇతర జట్లు ఎలా ఉన్నాయి.?..చెన్నై జట్టు ప్రస్తుతం శివమ్‌ దూబే, రాబిన్‌ ఉతప్పలపైనే అధికంగా ఆధారపడుతోంది. నాలుగేళ్లుగా ఈ టీ20 లీగ్‌లో ఆడుతున్నా ఎప్పుడూ పెద్దగా ఆకట్టుకోని దూబే ఈసారి విశేషంగా రాణిస్తున్నాడు. ముఖ్యంగా బ్యాటింగ్‌లో అతడే కీలక ఆటగాడిగా మారాడు. మరోవైపు ఓపెనర్‌గా రాబిన్‌ ఉతప్ప రాణిస్తున్నా.. గతేడాది టాప్ స్కోరర్‌, ఓపెనర్‌ రుతురాజ్‌ గైక్వాడ్‌ ఇబ్బందులు పడుతున్నాడు. అయితే, గుజరాత్‌తో జరిగిన గత మ్యాచ్‌లో అతడు రాణించడం ఊరటనిచ్చే విషయం. తర్వాత అంబటి రాయుడు అంతంత మాత్రంగానే ఉన్నాడు. కెప్టెన్ జడేజా ఆకట్టుకోలేకపోతున్నాడు. మరోవైపు ధోనీ తొలి మ్యాచ్‌లో మెరిసినా తర్వాత చెప్పుకోదగ్గ ఇన్నింగ్స్‌ ఆడలేదు. బౌలింగ్‌లో బ్రావో, మహీష్‌ తీక్షణలు ఆకట్టుకుంటున్నారు. ఇలాంటి పరిస్థితుల్లో చెన్నై 8 మ్యాచ్‌ల్లో 7 గెలవాలంటే మామూలు విషయం కాదు. కానీ, ప్రయత్నిస్తే కచ్చితంగా ముందుకు సాగే వీలుంది. దీంతో రాబోయే రోజుల్లో ఏయే జట్లతో ఎలా ఆడాల్సి ఉందో పరిశీలిద్దాం.
ముంబయి: చెన్నై తర్వాత ఆడాల్సిన టీమ్‌ ముంబయి. ఏప్రిల్ 21న ఒకటి, మే 12న ఇంకో మ్యాచ్‌ ఆడాల్సి ఉంది. అయితే, ఇప్పుడు ఆ జట్టు పరిస్థితి దీనికన్నా ఘోరంగా ఉంది. రోహిత్‌ సేన ఇప్పటివరకు ఆడిన ఆరు మ్యాచ్‌ల్లో ఒక్కటీ విజయం సాధించలేదు. దీంతో ఈ సీజన్‌లో ఇంకా విజయాల ఖాతా తెరవని జట్టుగా చిట్టచివరిస్థానంలో కొనసాగుతోంది. ఆ జట్టులో సూర్యకుమార్‌ ఒక్కడే చెప్పుకోదగ్గ ప్రదర్శన చేస్తున్నాడు. ఇషాన్‌ కిషన్‌, తిలక్‌ వర్మ ఫర్వాలేదనిపిస్తున్నా పెద్దగా రాణించలేకపోతున్నారు. మరోవైపు సీనియర్లు రోహిత్‌, పొలార్డ్‌, బుమ్రా ఏ మాత్రం ప్రభావం చూపలేకపోతున్నారు. దీంతో చెన్నై కాస్త కష్టపడితే ముంబయిపై రెండు విజయాలూ సాధించడం పెద్ద కష్టమేమీ కాదు.
పంజాబ్‌: ముంబయి తర్వాత చెన్నై ఆడాల్సింది పంజాబ్‌తో. ఈ సీజన్‌లో ఆ జట్టు ఆడిన ఆరు మ్యాచ్‌ల్లో 3 విజయాలు, 3 ఓటములతో పడిలేస్తూ కొనసాగుతోంది. ఈ నేపథ్యంలోనే ఏప్రిల్ 25న ఆ జట్టుతో ఈ సీజన్‌లో రెండో మ్యాచ్‌లో తలపడాల్సి ఉంది. ఇప్పటికే ఆడిన తొలి మ్యాచ్‌లో మయాంక్‌ అగర్వాల్‌ టీమ్‌ 54 పరుగుల తేడాతో చెన్నైపై విజయం సాధించింది. ఆ జట్టులో బిగ్‌ హిట్టర్‌ లియామ్‌ లివింగ్‌స్టోన్‌, ఓపెనర్‌ శిఖర్‌ ధావన్‌ బ్యాటింగ్‌లో అదరగొడుతున్నారు. కెప్టెన్ మయాంక్‌ అంతంత మాత్రంగా ఆడుతున్నా తనదైన రోజు ప్రత్యర్థికి ముచ్చెమటలు పట్టిస్తాడు. ఇక బౌలింగ్‌లో రాహుల్‌ చాహర్‌, కగీసో రబాడా ఆకట్టుకుంటున్నారు. దీంతో పంజాబ్‌తో జరిగే పోరులో చెన్నై గెలవాలంటే బ్యాటింగ్‌లో లివింగ్‌స్టోన్‌, ధావన్‌ను కట్టడి చేయాలి. అలా చేస్తే సగం మ్యాచ్‌ గెలిచేసినట్లే.