Shami World Cup 2023 :వరుసగా పది మ్యాచ్ల్లో గెలిచి వన్డే వరల్డ్ కప్ ఫైనల్లో భారత క్రికెట్ జట్టు ఓటమిపాలైంది. దీంతో యావత్ దేశం తీవ్ర నిరాశకు గురైన విషయం తెలిసిందే. ప్రధాని నరేంద్ర మోదీ ప్రత్యేకంగా టీమ్ఇండియా డ్రెస్సింగ్ రూమ్‌కు వెళ్లి మరీ ఆటగాళ్లను సముదాయించారు. తాజాగా స్టార్ పేసర్ మహమ్మద్ షమీ వరల్డ్ కప్ ఫైనల్ ఓటమిపై కీలక వ్యాఖ్యలు చేశాడు.
షమీ ఈ మెగా సమరంలో అత్యధిక వికెట్లు తీసిన బౌలర్‌గా నిలిచాడు. అయితే తాము ఫైనల్లో ఏం పొరపాటు చేశామనేది ఇప్పటికీ అర్థం కావడం లేదని పేర్కొన్నాడు. "దేశమంతా ఈ ఓటమితో తీవ్ర నిరుత్సాహానికి గురైంది. అభిమానులు ఎన్నో అంచనాలు పెంచుకున్నారు. మేం కూడా కప్‌ను సాధిద్దామనే లక్ష్యంతో బరిలోకి దిగాం. వందశాతం శ్రమించి ఫైనల్‌కు చేరాం. అక్కడా విజేతగా నిలవాలని కలలుగన్నాం. కానీ, అంచనాలు తారుమారయ్యాయి. మా కష్టమంతా బూడిదలో పోసిన పన్నీరైంది. ఎక్కడ పొరపాటు జరిగిందో కూడా చెప్పలేని పరిస్థితి. ఇప్పటికీ ఆ షాక్‌ నుంచి తేరుకోలేదు" అని షమీ తెలిపాడు.
"ఆసీస్‌తో జరిగిన వన్డే ప్రపంచకప్‌ ఫైనల్లో ఓటమి తర్వాత మేం నేరుగా డ్రెస్సింగ్ రూమ్‌కు వెళ్లిపోయాం. సహచరులం కూడా మాట్లాడుకోలేదు. అంతా నిశ్శబ్దంగా మారిపోయింది. తినాలనే ఆసక్తి కూడా లేదు. రెండు నెలలపాటు చేసిన శ్రమ వేస్ట్ కావడంతో నిరుత్సాహం చెందాం. ఆ సమయంలో భారత ప్రధాని నరేంద్ర మోదీ ఒక్కసారిగా డ్రెస్సింగ్ రూమ్‌లోకి వచ్చారు. మేమంతా తలెత్తి చూశాం. ఆయన వస్తున్నారనే సమాచారం కూడా మాకు ఇవ్వలేదు. ప్రతి ఒక్కరి దగ్గరకూ వచ్చి ధైర్యం చెప్పారు. ఆయన వెళ్లిన తర్వాతనే మేమంతా ఒకరితో మరొకరు మాట్లాడుకోవడం ప్రారంభించాం" అని షమీ చెప్పాడు.
కొన్నిరోజుల క్రితం కూడా ఈ ఓటమిపై మహ్మద్ షమీ స్పందించాడు. "దురదృష్టవశాత్తూ ఆరోజు మన రోజు కాదు. టోర్నమెంట్ మొత్తంలో మన జట్టుకు, నాకు మద్దతుగా నిలిచినందుకు భారతీయులందరికీ నేను కృతజ్ఞతలు తెలియజేస్తున్నాను. ప్రత్యేకంగా డ్రెస్సింగ్ రూమ్‌కు వచ్చి మా ఉత్సాహాన్ని పెంచినందుకు ప్రధాని నరేంద్ర మోదీకి ధన్యవాదాలు. మేము తిరిగి పుంజుకుంటామం" అని ట్వీట్ చేశాడు.
