బట్లర్ బాదుడు.. ఇంగ్లండ్ భారీ స్కోరు

సౌతాంప్టన్ వేదికగా పాక్​తో జరుగుతున్న రెండో వన్డేలో ఇంగ్లండ్ 373 పరుగుల భారీ స్కోరు సాధించింది. బట్లర్ 50 బంతుల్లోనే శతకంతో మెరిశాడు. 374 పరుగుల లక్ష్యంతో బరిలోకి దిగిన పాక్​ నిలకడగా ఆడుతోంది. 30 ఓవర్లలో వికెట్ నష్టానికి 194 పరుగులు చేసింది.

పాకిస్థాన్​తో జరుగుతున్న రెండో వన్డేలో ఇంగ్లండ్ 373 పరుగుల భారీస్కోరు సాధించింది. ఇంగ్లండ్ సౌతాంప్టన్​ వేదికగా జరుగుతున్న ఈ మ్యాచ్​లో బట్లర్ (110) శతకంతో చెలరేగాడు. 50 బంతుల్లోనే సెంచరీ పూర్తి చేసి పాకిస్థాన్​ బౌలర్లను బెంబేలెత్తించాడు. ఇంగ్లండ్ బ్యాట్స్​మెన్ జాసన్​ రాయ్ (87), బెయిర్ స్టో (51), మోర్గాన్ (71) అర్ధశతకాలతో ఆకట్టుకున్నారు. పాక్ బౌలర్లలో షాహిన్ అఫ్రిది, హసన్ అలీ, సోహైల్ తలో వికెట్ తీసుకున్నారు.

టాస్ ఓడి బ్యాటింగ్​కు దిగిన ఇంగ్లండ్​కు శుభారంభం దక్కింది. ఓపెనర్లు రాయ్, బెయిర్ స్టోలు 115 పరుగుల భాగస్వామ్యాన్ని నమోదు చేశారు. అనంతరం మోర్గాన్ అర్ధశతకంతో ఆకట్టుకోగా... రూట్ 40 పరుగులతో మెరిశాడు.

బట్లర్​ వీర బాదుడు..

ఆరంభం నుంచి దూకుడుగా ఆడిన బట్లర్ బౌలర్లకు చుక్కలు చూపించాడు. 55 బంతుల్లోనే 110 పరుగులు చేసి ఇంగ్లండ్​ భారీ స్కోరు చేయడంలో కీలకపాత్ర పోషించాడు. 6 ఫోర్లు, 9 సిక్సర్లతో స్టేడియాన్ని హోరెత్తించాడు. ఆద్యంతం పాక్ బౌలర్లను ఇబ్బంది పెడుతూ కెరీర్​లో ఏడో శతకాన్ని తన ఖాతాలో వేసుకున్నాడు.

374 పరుగుల లక్ష్య ఛేదనను ధాటిగా ఆరంభించింది పాకిస్థాన్. ఒపెనర్లు ఇమామ్​ ఉల్ హక్​ (35) - ఫకార్ జోడి తొలి వికెట్​కు 92 పరుగులు భాగస్వామ్యాన్ని నమోదు చేసింది. ఫకార్ జమాన్​ 93 బంతుల్లో 111 పరుగులతో క్రీజులో ఉన్నాడు. పాకిస్థాన్ 30 ఓవర్లలో వికెట్ నష్టానికి 194 పరుగులతో ఉంది.