ఆస్ట్రేలియా వేదికగా జరగనున్న టీ20 ప్రపంచ కప్‌ 2022లో పాల్గొనే జట్లకు శ్రీలంక దిగ్గజ స్పిన్నర్‌ ముత్తయ్య మురళీధరన్‌ స్వీట్ వార్నింగ్ ఇచ్చాడు. ఈ సిరీస్‌లో తమ స్పిన్నర్‌ వనిందు హసరంగ ప్రత్యర్థి బ్యాటర్లకు చుక్కలు చూపిస్తాడన్నాడు.
"టీ20 బౌలింగ్‌లో హసరంగ దిట్ట. బ్యాటర్లకు బలమైన ప్రత్యర్థిగా నిలుస్తాడు. అతడితో చాలా జాగ్రత్తగా ఉండాలి. గడిచిన మూడేళ్లలో ఈ కుర్రాడు అద్భుతమైన ఆటతీరు కనబరిచాడు. రానున్న ఆస్ట్రేలియన్‌ సిరీస్‌లో ఫింగర్‌ స్పిన్నర్లతో పోలిస్తే లెగ్‌ స్పిన్నర్లకే ఎక్కువ అవకాశాలు ఉంటాయి" అని ముత్తయ్య వివరించాడు. లెజెండ్స్‌ లీగ్‌ క్రికెట్‌ రెండో ఎడిషన్‌ కార్యక్రమంలో భాగంగా మురళీధరన్‌ మీడియాతో మాట్లాడాడు. ఈ సందర్భంగా లంక జట్టు ఆటతీరుపై తానెంతో నమ్మకంగా ఉన్నట్టు తెలిపాడు.