Virat Kohli Rohith Sharma: టీమ్‌ఇండియా స్టార్ బ్యాటర్లు రోహిత్ శర్మ, విరాట్ కోహ్లీ త్వరలోనే రాణిస్తారని, వారిద్దరిపై తనకు పూర్తి నమ్మకం ఉందని బీసీసీఐ అధ్యక్షుడు సౌరభ్‌ గంగూలీ అన్నాడు. ప్రస్తుతం జరుగుతున్న మెగా టీ20 లీగ్‌లో కోహ్లీ 9 మ్యాచ్‌ల్లో 16 సగటుతో 129 పరుగులు చేయగా.. రోహిత్ 8 మ్యాచ్‌ల్లో 19.13 సగటుతో 153 పరుగులే చేశాడు. దీంతో వీరిద్దరూ ఫామ్ కోల్పోయి సతమతమవుతున్నారు. ఈ నేపథ్యంలోనే తాజాగా ఓ ఛానల్‌తో మాట్లాడిన గంగూలీ వారిద్దరూ త్వరలోనే పుంజుకుంటారంటూ అండగా నిలిచాడు.
Sourav Ganguly Comments: "వాళ్లిద్దరూ గొప్ప ఆటగాళ్లు. త్వరలోనే ఫామ్లోకి వచ్చి పరుగులు సాధిస్తారనే నమ్మకముంది. ప్రస్తుతం కోహ్లీ ఏం ఆలోచిస్తున్నాడో నాకు తెలియదు. కానీ, అతడు కొద్ది రోజుల్లోనే తిరిగి మునుపటి స్థితికి చేరుకుంటాడు. అలాగే నేను ఈ సీజన్‌లోని అన్ని మ్యాచ్‌లనూ చూస్తున్నా. చాలా ఆసక్తిగా సాగుతోంది. ఎవరైనా విజేతగా నిలవొచ్చు. అందరూ బాగా ఆడుతున్నారు. కొత్తగా చేరిన గుజరాత్‌, లఖ్‌నవూ కూడా అద్భుతంగా ఆడుతున్నాయి" అని గంగూలీ పేర్కొన్నాడు.
కోహ్లీ నాలుగింతలు కష్టపడతాడు.. బెంగళూరు మాజీ సారథి విరాట్ కోహ్లీ ఇతరులతో పోలిస్తే నాలుగింతలు కష్టపడతాడని, అతడు మునుపటిలా స్వేచ్ఛగా ఆడితే తిరిగి గాడిలో పడతాడని టీమ్‌ఇండియా మాజీ ఆల్‌రౌండర్‌ యువరాజ్ సింగ్ అన్నాడు.