ఐపీఎల్ 14వ సీజన్లో భాగంగా నేడు కోల్కతా నైట్ రైడర్స్, రాజస్థాన్ రాయల్స్ మధ్య మ్యాచ్ జరగనుంది. ఈ ఆసక్తికర పోరుకు వాంఖడే వేదిక కానుంది. ఇప్పటికే చెరో నాలుగు మ్యాచ్లు ఆడిన ఇరుజట్లు మూడు ఓటములను మూటగట్టుకున్నాయి. ఇక పాయింట్ల పట్టికలో శాంసన్ సేన చివరి స్థానంలో ఉండగా.. మోర్గాన్ సేన చివరి నుంచి మూడో స్థానంలో ఉంది.
కోల్కతా గెలుపు బాట పట్టేనా..
చివరగా చెన్నైతో జరిగిన మ్యాచ్లో 220 పరుగుల భారీ లక్ష్యాన్ని ఛేదించేలా కనిపించిన కోల్కతా.. విజయానికి కొద్ది దూరంలో నిలిచిపోయింది. టాపార్డర్ విఫలమైనప్పటికీ మిడిలార్డర్ ఫర్వాలేదనిపించింది. ఓపెనర్లు గిల్-రానాతో పాటు కెప్టెన్ మోర్గాన్ రాణిస్తే బ్యాటింగ్కు తిరుగుండదు.
ఇక బౌలింగ్లో వరుణ్ చక్రవర్తి, ఆండ్రూ రస్సెల్ ఫర్వాలేదనిపిస్తున్నారు. ప్రసిధ్ కృష్ణ, కమిన్స్ స్థిరంగా రాణించకపోగా.. భారీగా పరుగులు ఇస్తున్నారు. దీంతో ప్రత్యర్థి జట్లు పరుగుల పండగ చేసుకుంటున్నాయి. వీరితో పాటు షకిబుల్ హసన్ ఆల్రౌండ్ ప్రదర్శన చేయాలని కేకేఆర్ కోరుకుంటోంది.