జహీర్​ను అధిగమించిన భువి.. ఆ జాబితాలో తొలి భారత పేసర్​గానూ..!

IPL 2022 Bhuvaneshwar Kumar: ఐపీఎల్​ మెగా లీగ్​లో భాగంగా ఆదివారం పంజాబ్ కింగ్స్​తో జరిగిన మ్యాచ్​లో సన్​రైజర్స్​ 7 వికెట్ల తేడాతో ఘనవిజయం సాధించింది. కాగా, ఈ మ్యాచ్​లో హైదరాబాద్​ జట్టు​ బౌలర్​ భువనేశ్వర్​ కుమార్ రెండు అరుదైన ఘనతలను సాధించాడు.

IPL 2022 Bhuvaneshwar Kumar: ఐపీఎల్​ 15వ సీజన్​ రసవత్తరంగా సాగుతోంది. సన్​రైజర్స్​ జట్టు వరుస విజయాలతో దూసుకుపోతోంది. ఆదివారం పంజాబ్​తో జరిగిన మ్యాచ్​లో ఘనవిజయం సాధించింది. ఈ మ్యాచ్‌లో ప‌వ‌ర్‌ప్లేలోనే వికెట్ తీసిన భువనేశ్వ‌ర్.. స‌రికొత్త రికార్డు నెల‌కొల్పాడు. ఐపీఎల్ చ‌రిత్ర‌లో ప‌వ‌ర్‌ప్లేలో అత్య‌ధిక వికెట్లు తీసిన బౌల‌ర్‌గా నిలిచాడు. ఇంత‌కుముందు ఈ రికార్డుతో ఉన్న సందీప్ శ‌ర్మ‌, జహీర్​ ఖాన్​ను భువ‌నేశ్వ‌ర్ కుమార్ అధిగ‌మించాడు.

ప‌వ‌ర్‌ప్లేలో అత్య‌ధిక వికెట్లు.. పంజాబ్ కింగ్స్‌తో మ్యాచ్‌లో ఇన్నింగ్స్ మూడో ఓవ‌ర్లోనే స‌న్‌రైజ‌ర్స్ హైద‌రాబాద్ బౌల‌ర్ భువ‌నేశ్వ‌ర్ కుమార్ వికెట్ సాధించాడు. ఆ ఓవ‌ర్ నాలుగో బంతికి పంజాబ్ కింగ్స్ కెప్టెన్ శిఖ‌ర్ ధావ‌న్‌ను ఔట్ చేశాడు. దీంతో 10 ప‌రుగుల వ‌ద్ద పంజాబ్ కింగ్స్ జట్టు తొలి వికెట్ కోల్పోయింది. ఈ క్ర‌మంలో ఐపీఎల్‌ ప‌వ‌ర్‌ప్లేలో అత్య‌ధిక వికెట్లు తీసిన బౌల‌ర్‌గా భువ‌నేశ్వ‌ర్ కుమార్ రికార్డు సృష్టించాడు. పవర్​ప్లేలో ఇప్ప‌టివ‌ర‌కు 54 వికెట్లు తీసిన భువ‌నేశ్వ‌ర్ 138 మ్యాచ్‌ల్లో ఈ రికార్డు అందుకున్నాడు.

150 వికెట్ల మైలురాయి..ఈ మ్యాచ్​లో మూడు వికెట్లు తీసిన భువనేశ్వర్​.. ఐపీఎల్​ చరిత్రలో 150 వికెట్ల మైలురాయిని అందుకున్న తొలి భారత పేసర్​గా రికార్డు సృష్టించాడు. ఐపీఎల్​ చరిత్రలో అత్యధిక వికెట్లు తీసిన వారి జాబితాలో పేసర్లు వెస్టిండీస్​ ఆల్​రౌండర్​ డ్వేన్​ బ్రావో(174), శ్రీలంక దిగ్గజ ఆటగాడు లసిత్​ మలింగ(170) మొదటి రెండు స్థానాల్లో ఉన్నారు. భారత స్పిన్నర్లు అమిత్ మిశ్రా (166), పీయూష్ చావ్లా (157), యుజ్వేంద్ర చాహల్ (151), హర్భజన్ సింగ్ (150) ఈ జాబితాలో ఉన్నారు.

ఇవీ చదవండి:సన్​రైజర్స్​ జైత్రయాత్ర.. పంజాబ్​పై ఘన విజయం