రాజస్థాన్​ జట్టులో ఉండలేను.. షేన్​ వార్న్​ హెచ్చరిక!

Shane Warne almost quit Rajasthan Royals: ఐపీఎల్​ తొలి సీజన్​లోనే రాజస్థాన్ రాయల్స్​ను ఛాంపియన్​గా నిలిపి సంచలనం సృష్టించాడు దివంగత క్రికెటర్ షేన్​ వార్న్. అయితే ఆ టోర్నీ ఆరంభానికి ముందు జట్టు యజమానికి షాకిచ్చాడు వార్న్​. తాను చెప్పినట్లు వినకపోతే జట్టు నుంచి తప్పుకుంటానని హెచ్చరించాడు. ఇంతకీ ఏం జరిగిందంటే?

Shane Warne almost quit Rajasthan Royals: రాజస్థాన్‌ను తొలి సీజన్‌లోనే విజేతగా నిలిపి సంచలనం సృష్టించిన దిగ్గజ క్రికెటర్‌, దివంగత షేన్‌వార్న్‌.. ఆ టోర్నీ ఆరంభానికి ముందే ఆ జట్టు యజమాని మనోజ్‌ బదాలేకు షాకిచ్చాడు. ఓ ఆటగాడిని ఎంపిక చేసే విషయంలో ఇద్దరి మధ్యా భిన్నాభిప్రాయాలు వ్యక్తమవడం వల్ల యజమానినే బెదిరించాడు. తాను చెప్పినట్లు వినకపోతే ఆ టోర్నీ నుంచి తప్పుకొంటానని వార్న్‌ హెచ్చరించడంతో మనోజ్‌ చేసేదిలేక మిన్నకుండిపోయాడు. ఈ విషయాన్ని షేన్‌వార్న్‌ తన ఆటోబయోగ్రఫి 'నో స్పిన్‌'లో ఇలా రాసుకొచ్చాడు.

"అప్పుడు జట్టు ఎంపికలో మనోజ్‌ ఒక ఆటగాడిని ఎంపిక చేయాలని నన్ను కోరారు. కానీ, అతడిని ఎంపిక చేస్తే జట్టులో నాకు విలువ ఉండదని అనిపించింది. ఆ ఆటగాడు సరిగ్గా ఆడకపోయినా జట్టులో ఉన్నాడంటే.. ఎవరో కావాలనే అతడికి మేలు చేయడానికి ప్రయత్నిస్తున్నారని మిగతా ఆటగాళ్లు నన్ను తప్పుగా అర్థం చేసుకునే వీలుంది. అప్పుడు నేను వారి నమ్మకాన్ని కోల్పోతాను. ఒకవేళ ఆ ఆటగాడిని కచ్చితంగా జట్టులో ఉంచాలనుకుంటే మీరే పెట్టుకోండి నేను వెళ్లిపోతాను. నేను ఈ జట్టులో ఉండలేను. మీ డబ్బు మీకు తిరిగిస్తా" అని చెప్పడం వల్ల "ఆయన నిజంగా నువ్వు వెళ్లిపోతావా?" అని అడగడంతో ఔనని బదులిచ్చా. దీంతో తర్వాతి రోజు మనోజ్‌ రాజీపడి ఆ ఆటగాడిని ఎంపికచేయకపోయినా ఫర్వాలేదని చెప్పాడు" అని వార్న్‌ తన పుస్తకంలో వివరించాడు.

ఇదీ చూడండి:IPL final 2022: ఈసారి కప్పు ఎవరికి దక్కెనో? కొత్తదనమా లేక పాతపరమా?