ఐపీఎల్‌-2023లో భాగంగా సోమవారం ఆర్సీబీతో జరిగిన మ్యాచ్లో లఖ్నవూ సూపర్ జెయింట్స్‌ కెప్టెన్, కేఎల్ రాహుల్ తన పేలవ ఫామ్‌ను కొనసాగించాడు. ఈ మెగా ఈవెంట్‌ మ్యాచ్లో రాహుల్ తన ఆటతీరుతో అభిమానులకు చిరాకు తెప్పించాడు. భారీ లక్ష్యాన్ని ఛేదించాల్సిన సమయంలో రాహుల్.. టెస్టు మ్యాచ్‌ను తలపించేలా తన ఇన్నింగ్స్‌ను కొనసాగించాడు. 213 టార్గెట్తో బరిలోకి దిగిన లఖ్నవూ జట్టులో 20 బంతులు ఎదుర్కొన్న రాహుల్.. కేవలం 18 పరుగుల స్కోర్ చేసి పెవిలియన్‌ బాట పట్టాడు. అతడు ఆడిన 18 బంతుల్లో కేవలం ఒకే ఒక బౌండరీ ఉంది. మరోవైపు ఈ ఏడాది సీజన్లో ఇప్పటివరకు మూడు మ్యాచుల్లోనూ కేవలం 61 పరుగులను మాత్రమే స్కోర్ చేశాడు. ఇక సన్రైజర్స్పై అతడు చేసిన 35 పరుగుల స్కోర్ ఇప్పటి వరకు ఆడిన వాటిల్లో అత్యధిక స్కోర్‌గా ఉంది. ఆ స్కోర్ కూడా అతడు 31 బంతుల్లో చేశాడు. అయితే తాజాగా ఆర్సీబీపై చెత్త ఇన్నింగ్స్‌ ఆడిన కేఎల్ రాహుల్ను సామాజిక మాధ్యమాల్లో నెటిజన్లు దారుణంగా ట్రోల్ చేస్తున్నారు." ఏంటి రాహుల్ ఇదేమైనా.. టెస్ట్ మ్యాచ్లు అనుకుంటున్నావా" అంటూ పోస్ట్ చేస్తున్నారు. ఇంకొంతమందేమో.. "రూ.17 కోట్లు తీసుకున్నావు.. టెస్టు క్రికెట్‌ కన్నా దారుణంగా ఆడుతున్నావేంటీ" అంటూ కామెంట్లు చేస్తున్నారు.
అందుకే అలా ఆడాను..అయితే ఆర్సీబీతో జరిగిన మ్యాచ్లో తన బ్యాటింగ్ విధానాన్ని లఖ్నవూ కెప్టెన్ కేఎల్ రాహుల్ సమర్థించుకున్నాడు. అతనెందుకు నిదానంగా బ్యాటింగ్ చేయాల్సి వచ్చిందో వివరణ ఇచ్చాడు. వెనువెంటనే వికెట్లు పడిపోవడంతో జాగ్రత్తగా బ్యాటింగ్ చేయాల్సి వచ్చిందని, పరిస్థితిని బట్టి ఆడానని రాహుల్ చెప్పుకొచ్చాడు.