ఐపీఎల్లో చెన్నై సూపర్ కింగ్స్ ఎందుకు విజయవంతం అవుతుందో ఆ జట్టు కోచ్ స్టీఫెన్ ఫ్లెమింగ్ వివరించాడు. అనుకూల ఫలితాలు రానప్పుడు ప్రశాంతంగా ఉండటమే తమ విజయ రహస్యమని పేర్కొన్నాడు. షేన్‌ వాట్సన్‌ (83; 53 బంతుల్లో) ఫామ్‌లోకి రావడం ఇందుకు ఉదాహరణగా వర్ణించాడు. పంజాబ్పై 10 వికెట్ల తేడాతో విజయం సాధించాక ఫ్లెమింగ్ మీడియాతో మాట్లాడాడు.
"ఎక్కువ అవకాశాలు ఇవ్వడమే ఆటగాళ్లకు సాయపడుతోంది. మేం బాగా లేని విభాగాలను గుర్తిస్తాం. కానీ జట్టును మార్చేందుకు ఇష్టపడం. ఎందుకంటే ఆ మార్పు ఉపయోగపడుతుందో లేదో తెలియదు. ఆటతీరు, పరిస్థితులను మెరుగుపర్చేందుకు మేం ప్రయత్నిస్తాం. బాగా ఆడితే వీలైనంత సుదీర్ఘకాలం ప్రోత్సహిస్తాం."