రాహుల్​తో ఆరెంజ్​ క్యాప్​.. రబాడాతో పర్పుల్​ క్యాప్​

ఐపీఎల్​ దాదాపు మిడ్​-సీజన్​ వరకు వచ్చినా ఆరెంజ్ క్యాప్​, పర్పుల్​ క్యాప్​లను ఇద్దరు ఆటగాళ్లే కొనసాగిస్తున్నారు. టోర్నీలో అత్యధికంగా 313 పరుగులతో కేఎల్​ రాహుల్​ ఆరెంజ్​ క్యాప్​ను, 12 వికెట్లు పడగొట్టిన దిల్లీ క్యాపిటల్స్​ బౌలర్​ కగిసో రబాడా పర్పుల్ క్యాప్​ను దక్కించుకున్నారు.

ప్రస్తుత ఐపీఎల్​ సీజన్​లో ఇప్పటివరకు జరిగిన 22 మ్యాచ్​ల తర్వాత కూడా కింగ్స్​ ఎలెవన్​ పంజాబ్​ కెప్టెన్​ కేఎల్​ రాహుల్​ ఆరెంజ్​ క్యాప్​పై పట్టు కొనసాగిస్తున్నాడు. మరోవైపు దిల్లీ క్యాపిటల్స్​కు చెందిన కగిసో రబాడా అద్భుత బౌలింగ్​ ప్రదర్శనతో పర్పుల్​ క్యాప్​ను తన వద్దే ఉంచుకున్నాడు.

ఓడినా.. క్యాప్​ మీద పట్టు

​దుబాయ్​ వేదికగా గురువారం సాయంత్రం జరిగిన మ్యాచ్​లో పంజాబ్​పై 69 పరుగుల తేడాతో సన్​రైజర్స్​ హైదరాబాద్​ విజయం సాధించింది. ఈ మ్యాచ్​లో సన్​రైజర్స్ బౌలర్ల ధాటికి కేఎల్​ రాహుల్​ కేవలం 11 పరుగులకే వెనుదిరిగాడు. మొత్తం 313 రన్స్​ చేసి టోర్నీలో అత్యధిక పరుగులు చేసిన జాబితాలో అగ్రస్థానంలో కొనసాగుతూ ఆరెంజ్​ క్యాప్​ను కొనసాగిస్తున్నాడు. ఇతని తర్వాత రెండో స్థానంలో చెన్నై సూపర్​ కింగ్స్​ బ్యాట్స్​మన్​ డుప్లెసిస్​ ఆడిన ఆరు మ్యాచ్​ల్లో 299 పరుగులు చేశాడు. 281 రన్స్​తో పంజాబ్​ ఓపెనర్​ మయాంక్​ అగర్వాల్​ ఈ జాబితాలో మూడోస్థానంలో ఉన్నాడు.

రాహుల్​తో ఆరెంజ్​ క్యాప్​.. రబాడాతో పర్పుల్​ క్యాప్​

పర్పుల్ క్యాప్​ రబాడా వద్దే

ప్రస్తుత ఐపీఎల్​ సీజన్​లో అత్యధిక వికెట్లు సాధించిన బౌలర్ల జాబితాలో దిల్లీ క్యాపిటల్స్​కు చెందిన కగిసో రబాడా అగ్రస్థానంలో ఉన్నాడు. టోర్నీలో రబాడా ఆడిన ఐదు మ్యాచ్​ల్లో 12 వికెట్లు పడగొట్టాడు. ఆరు మ్యాచ్​ల్లో 11 వికెట్లు సాధించిన ముంబయి ఇండియన్స్​ బౌలర్​ బుమ్రా రెండో స్థానంలో కొనసాగుతున్నాడు. అదే జట్టుకు చెందిన ట్రెంట్​ బౌల్ట్​ ఆరు మ్యాచ్​ల్లో 10 వికెట్లు సాధించి మూడో స్థానంలో ఉన్నాడు.

ఆరెంజ్​ క్యాప్​.. ఐపీఎల్​ సీజన్​లో అత్యధిక పరుగులు చేసిన బ్యాట్స్​మన్​కు ఇచ్చే గౌరవం. టోర్నీలో అత్యధిక వికెట్లు సాధించిన బౌలర్​కు సూచికంగా పర్పుల్​ క్యాప్​ ఇస్తారు. ఇలా టోర్నీ పూర్తయ్యే సరికి అనేక ఆటాగాళ్ల చేతులు మారి చివరిగా ఈ జాబితాలోని తొలిస్థానంలో ఎవరుంటారో వారికే ఈ రెండు క్యాప్​లను అంతిమంగా బహుకరిస్తారు.