రసెల్ విధ్వంసం.. బెంగళూరుకు వరుసగా ఐదో పరాజయం

వరుసగా ఐదో మ్యాచ్​లో ఓడిపోయింది బెంగళూరు జట్టు. 206 పరుగుల లక్ష్యాన్ని మరో ఐదు బంతులుండగానే ఛేదించింది కోల్​కతా. రసెల్ 13 బంతుల్లో 48 పరుగులతో విధ్వంసం సృష్టించాడు.

రాయల్ ఛాలెంజర్స్ బెంగళూరు జట్టు పరాజయాల పరంపర కొనసాగుతోంది. బెంగళూరు వేదికగా జరిగిన మ్యాచ్​లో కోల్​కతా 5 వికెట్ల తేడాతో గెలిచింది. రసెల్ మరోసారి విధ్వంసం సృష్టించి మ్యాచ్​ను బెంగళూరుకు దూరం చేశాడు. మొదట బ్యాటింగ్ చేసిన బెంగళూరు నిర్ణీత 20వ ఓవర్లలో 205 పరుగులు చేసింది. కోల్​కతా 19.1 ఓవర్లలోనే లక్ష్యాన్ని ఛేదించింది.

ఈ గెలుపుతో కోల్​కతా పాయింట్ల పట్టికలో అగ్రస్థానానికి చేరింది. రసెల్​కు మ్యాన్ ఆఫ్ ది మ్యాచ్​ దక్కింది.

రసెల్ విజృంభన

ఓ దశలో 17 ఓవర్లకు 153 పరుగులతో ఐదు వికెట్లు కోల్పోయింది కోల్​కతా. అలాంటి పరిస్థితిలో రసెల్ 13 బంతుల్లో 48 పరుగులతో విజృభించాడు. ఏడు సిక్సర్లతో ఊచకోత కోశాడు. సిరాజ్ వేసిన 18వ ఓవర్లో నోబాల్​ను సిక్సర్​గా మలిచాడు. తర్వాత ఫ్రీ హిట్​ను కూడా సిక్సర్ కొట్టి ఒక్క బంతికే 13 పరుగులు పిండుకున్నాడు రసెల్. ఓ దశలో కోల్​కతా ఓడిపోతుందని చాలా మంది అనుకున్నారు. కానీ రసెల్​ మెరుపు బ్యాటింగ్ వల్ల ఐదు బంతులు మిగిలి ఉండగానే విజయం సాధించింది.

కోహ్లీతో ఏబీ డెవిలియర్స్​

కోల్​కతా ఆరంభంలోనే నరైన్ వికెట్​ కోల్పోయింది. అనంతరం క్రిస్ లిన్, ఊతప్ప ధాటిగా ఆడి పది ఓవర్లకు 93 పరుగులు చేశారు. అనంతరం త్వరత్వరగా వికెట్లు కోల్పోయింది. క్రిస్ లిన్(43), ఉతప్ప(33), దినేశ్ కార్తీక్(19) ఆకట్టుకున్నారు. బెంగళూరు బౌలింగ్​లో నవదీప్ సైనీ, పవన్ నేగి తలో రెండు వికెట్లు తీసుకున్నారు.

రాణించిన కోహ్లి, డివిలియర్స్​

టాస్ ఓడి మొదట బ్యాటింగ్ దిగిన కోహ్లి సేన ఆరంభం నుంచి ధాటిగా ఆడింది. కోహ్లి(84, 49 బంతుల్లో), డివిలియర్స్(63, 32 బంతుల్లో)​ అర్థ శతకాలతో రాణించారు. కోల్​కతా బౌలర్లలో నితీశ్ రానా, కుల్దీప్ యాదవ్, సునీల్ నరైన్ తలో వికెట్ తమ ఖాతాలో వేసుకున్నారు.

ఈ మ్యాచ్​లో రికార్డులు

• ఐపీఎల్​లో రసెల్ వెయ్యి పరుగులు పూర్తి చేసుకున్నాడు.
• టీ20 కెరీర్​లో 8వేల పరుగులు సాధించిన భారత బ్యాట్స్​మెన్​గా రికార్డు సృష్టించాడు విరాట్​ కోహ్లి.
• సునీల్ నరైన్ టీ 20ల్లో 2000 వేల పరుగులు పూర్తి చేశాడు.