అస్థిరమైన ప్రదర్శనతో పాయింట్ల పట్టికలో ఐదో స్థానానికి పడిపోయింది పంజాబ్. ఆడిన 7 మ్యాచ్ల్లో రెండు గెలిచి ఏడో స్థానంలో ఉంది రాజస్థాన్. ఈ రెండు జట్ల మధ్య నేడు మ్యాచ్ జరగనుంది.
ఇరుజట్లు తలపడిన మొదటి మ్యాచ్లోనే మన్కడింగ్ వివాదం చెలరేగింది. రాజస్థాన్ జట్టు ఈ కారణంతోనే ఓటమిపాలైందని.. పంజాబ్ కెప్టెన్ అశ్విన్పై క్రికెట్ అభిమానులు ఆగ్రహం వ్యక్తం చేశారు. మరోసారి వీరి మధ్య మ్యాచ్ జరుగుతుండటం ఆసక్తికరంగా మారింది.
పంజాబ్ జట్టు బౌలింగ్లో స్థిరత్వం కనిపించట్లేదు. ముంబయితో జరిగిన మ్యాచ్లో 197 పరుగుల లక్ష్యాన్ని కాపాడుకోలేక ఓడింది. పొలార్డ్ 31 బంతుల్లో 83 పరుగులు చేసి కింగ్స్ ఎలెవన్కు విజయాన్ని దూరం చేశాడు.
షమి, ఆండ్రూ టై లతో పాటు ఆల్ రౌండర్ సామ్ కరన్ ధారాళంగా పరుగులు సమర్పించుకుంటున్నారు. అశ్విన్ తప్ప మిగతావారు రాణించట్లేదు. ఈ మ్యాచ్లో సారథికి బౌలర్లు సహకరించాలని జట్టు భావిస్తోంది. బ్యాటింగ్లో మయాంక్ అగర్వాల్, మిల్లర్, సామ్ కరన్, మన్దీప్ సింగ్ రాణించాల్సిన అవసరం ఉంది.
గత మ్యాచ్లో ముంబయిపై విజయంతో రాజస్థాన్ జోరుమీదుంది. బట్లర్ ఫామ్ రాయల్స్కు కలిసొచ్చే అంశం. రహానే, శాంసన్, స్మిత్ కూడా కీలక సమయంలో విలువైన పరుగులు జోడిస్తున్నారు. బౌలర్ల విషయానికొస్తే జోఫ్రా ఆర్చర్ అద్భుత ప్రదర్శన కనబరుస్తున్నాడు. ఉనద్కట్, ధవల్ కులకర్ణి, శ్రేయస్ గోపాల్ కూడా రాణిస్తున్నారు. గత మ్యాచ్లో గాయంతో దూరమైన స్టోక్స్ ఈ మ్యాచ్లో ఆడతాడని జట్టు భావిస్తోంది.