అలవోకగా గెలిచిన చెన్నై... ఫైనల్లో ముంబయితో ఢీ

విశాఖ వేదికగా దిల్లీతో జరిగిన మ్యాచ్​లో చెన్నై సూపర్​కింగ్స్​ 6 వికెట్ల తేడాతో విజయం సాధించింది. వాట్సన్, డుప్లెసిస్ అర్ధశతకాలతో విజృంభించారు. ఈ విజయంతో మే 12న జరిగే ఫైనల్లో ముంబయితో తలపడనుంది ధోని సేన.

దిల్లీ క్యాపిటల్స్​తో జరిగిన రెండో క్వాలిఫయర్​ మ్యాచ్​లో చెన్నై సూపర్​కింగ్స్ 6 వికెట్ల తేడాతో గెలిచింది. 148 పరుగుల లక్ష్యంతో బరిలోకి దిగిన చెన్నై 19 ఓవర్లలో 4 వికెట్లు కోల్పోయి అలవోకగా గెలిచింది. ఓపెనర్లు వాట్సన్(50), డుప్లెసిస్(50)​ అర్ధశతకాలతో అదరగొట్టారు. ఈ విజయంతో మే 12న జరిగే ఫైనల్​లో ముంబయితో తలపడనుంది చెన్నై సూపర్​కింగ్స్​. ప్రస్తుత సీజన్​లో 2 లీగ్​ మ్యాచ్​లు, ప్లే ఆఫ్​ లోనూ ధోని సేనను ఓడించింది ముంబయి.

దిల్లీ బౌలర్లలో బౌల్ట్​, అమిత్ మిశ్రా, ఇషాంత్, అక్షర్ పటేల్ తలో వికెట్ తీసుకున్నారు. మ్యాన్ ఆఫ్​ ద మ్యాచ్ అవార్డు చెన్నై ఆటగాడు డుప్లెసిస్​కు దక్కింది.

అర్ధశతకాలతో అదరగొట్టిన చెన్నై ఓపెనర్లు..

ఓపెనర్లు వాట్సన్​, డుప్లెసిస్​ అర్ధశతకాలతో చెలరేగారు. వీరిద్దరూ తొలి వికెట్​కు 81 పరుగుల భాగస్వామ్యం నమోదు చేశారు. ఆరంభంలో నిదానంగా ఆడిన ఈ జంట అనంతరం బ్యాట్​కు పనిపెంచారు. జట్టు స్కోరు 48 వద్దే 42 పరుగులతో మంచి జోరుమీదున్న డుప్లెసిస్.. 38 బంతుల్లో అర్ధశతకం పూర్తిచేశాడు. అనంతరం బౌల్ట్​ బౌలింగ్​లో ఔటయ్యాడు. వాట్సన్​ నెమ్మదిగా ఆరంభించినా.. తర్వాత రెచ్చిపోయాడు. 31 బంతుల్లోనే 50 పరుగులు పూర్తి చేసి మిశ్రా బౌలింగ్​లో వెనుదిరిగాడు.

వీరిద్దరు ఔటైన తర్వాత స్కోరు వేగం నెమ్మదించినా... అప్పటికే విజయం ఖరారైంది. చివర్లో రాయుడు(19), బ్రావో(4) మిగతా పని పూర్తి చేశారు. తొలి ఓవర్లో ఒక్క పరుగే చేసిన చెన్నై మరో ఓవర్​ మిగిలుండగానే లక్ష్యాన్ని ఛేదించింది.

దిల్లీలో పంత్​ ఒక్కడే​....

ముందుగా బ్యాటింగ్​ చేసిన దిల్లీ నిర్ణీత 20 ఓవర్లలో 147 పరుగులు చేసింది. రిషభ్ పంత్(38), మన్రో(27) మినహా మిగతావారు ఆకట్టుకోలేకపోయారు. చెన్నై బౌలర్లు సమష్టిగా రాణించి క్యాపిటల్స్​ జట్టును తక్కువ స్కోరుకే కట్టడి చేశారు. దీపక్, జడేజా, హర్భజన్, బ్రేవో తలో రెండు వికెట్లు తీసి చెన్నై విజయంలో కీలకపాత్ర పోషించారు.

చెన్నై- ముంబయి మ్యాచ్​ ప్రత్యేకతలు..

ముంబయితో ఇప్పటికే మూడు సార్లు ఫైనల్​లో​ తలపడింది చెన్నై.

1. 2010లో ముంబయి వేదికగా జరిగిన మ్యాచ్​లో చెన్నై 22 పరుగుల తేడాతో గెలిచింది.
2. 2013లో కోల్​కతా వేదికగా జరిగిన మ్యాచ్​లో ముంబయి 23 పరుగుల తేడాతో విజయం సాధించింది.
3. 2015లో కోల్​కతాలో జరిగిన ఫైనల్​లో ముంబయి 41 పరుగుల తేడాతో నెగ్గింది.

• ఇంతవరకూ ఐపీఎల్​ ఫైనల్​ ఆడని ఏకైక జట్టుగా దిల్లీ రికార్డు సృష్టించింది.
• 2011 నుంచి ఇప్పటి వరకు పాయింట్ల పట్టికలో టాప్ 2లో ఉన్న జట్లే ఏడు సార్లు ఫైనల్​లో​ తలపడ్డాయి. కేవలం రెండు సార్లే (2012, 2016) ఇతర జట్లు ఫైనల్​కొచ్చాయి.