VVS Laxman Praises KS Bharat: టీమ్ఇండియా యువ కీపర్‌, బ్యాటర్‌ కేఎస్ భరత్ హెడ్‌కోచ్‌ రాహుల్‌ ద్రవిడ్ నమ్మకాన్ని నిలబెట్టుకున్నాడని దిగ్గజ క్రికెటర్ వీవీఎస్ లక్ష్మణ్ అభిప్రాయపడ్డాడు. న్యూజిలాండ్తో జరుగుతున్న తొలి టెస్టులో శనివారం భరత్.. వృద్ధిమాన్‌ సాహాకు గాయం కారణంగా ఇతడికి బదులుగా వికెట్ కీపింగ్ చేశాడు. ఈ సందర్భంగా అతడు మూడు కీలక వికెట్లు తీయడంలో భాగస్వామి అయ్యాడు. ఈ నేపథ్యంలోనే లక్ష్మణ్ ఓ క్రీడా ఛానెల్‌తో మాట్లాడుతూ భరత్ కీపింగ్ నైపుణ్యాలను మెచ్చుకున్నాడు. అతడి గురించి ద్రవిడ్ తనతో ముందే ఓసారి చర్చించాడని పేర్కొన్నాడు. భారత్‌లో సాహా తర్వాత అంత మంచి కీపర్‌ ఈ ఆంధ్రా క్రికెటరే అని పేర్కొన్నాడని గుర్తుచేసుకున్నాడు.
"భరత్.. సెలెక్టర్లు, కోచ్‌ ద్రవిడ్ నమ్మకాన్ని నిలబెట్టుకోవడం చాలా మంచి పరిణామం. వాళ్ల విశ్వాసాన్ని నిలబెట్టుకొనేలా ఆడాడు. స్పిన్‌ బౌలింగ్‌కు అనుకూలించే ఇలాంటి పిచ్‌లపై సరైన కీపర్‌ లేకపోతే పలు అవకాశాలు చేజారతాయి. ఈరోజు భరత్ నుంచి మనం చూసింది అత్యద్భుతమైన ప్రదర్శన. కొద్ది రోజుల క్రితమే జట్టులోకి వచ్చి.. అనుకోకుండా అందిన అవకాశాన్ని నిర్భయంగా సద్వినియోగం చేసుకున్నాడు. ఇది అతడికి మంచి అనుభవంగా పనికొస్తుంది. అతడి కెరీర్‌ ముందుకు సాగడానికి ఇది మరింత తోడ్పడుతుంది. ఈ ప్రదర్శనతో అతడికి మంచి ఆత్మవిశ్వాసం లభిస్తుంది."