ఆస్ట్రేలియాతో జరిగిన రెండో టీ20లో కీలక ఇన్నింగ్స్ ఆడి భారత్ విజయంలో ముఖ్య పాత్ర పోషించిన ఆల్రౌండర్ హార్దిక్ పాండ్యను ఆస్ట్రేలియా కోచ్ జస్టిన్ లాంగర్ కొనియాడాడు. మ్యాచ్ ముగించడంలో హార్దిక్ పాండ్య.. ధోనీని తలపించాడని పేర్కొన్నాడు. ధోనీ ఆటతీరును గుర్తుచేశాడని తెలిపాడు.
''ఆటలో ఇదో అద్భుత ఘట్టం. పాండ్య ఎంత ప్రమాదకర ఆటగాడో మాకు తెలుసు. గతంలో మేం ధోనీని చూశాం. ఇప్పుడు పాండ్య రెండో టీ-20లో అదే తరహాలో ఆడాడు.''
- జస్టిన్ లాంగర్, ఆస్ట్రేలియా కోచ్
కోహ్లీయే బెస్ట్..
టీమ్ఇండియా సారథి విరాట్ కోహ్లీని కూడా ప్రశంసలతో ముంచెత్తాడు ఆస్ట్రేలియా కోచ్ లాంగర్. రెండో టీ20లో విరాట్ కొన్ని అద్భుతమైన షాట్లు ఆడాడని కొనియాడాడు.
" ఈ ఆట చాలా ఉత్కంఠభరితంగా సాగింది. విజయం ఆసీస్దే అని భావించాను. కానీ, భారత ఆటగాళ్లు బాగా రాణించారు. కోహ్లీ అద్భుతమైన ఆటగాడు అని మొదటినుంచి చెబుతున్నాను. ఈ మ్యాచ్లో చక్కటి షాట్స్ కొట్టాడు".
-జస్టిన్ లాంగర్, ఆస్ట్రేలియా కోచ్.
ఆస్ట్రేలియాతో జరిగిన రెండో టీ20 మ్యాచ్లో భారత్ గెలిచి.. సిరీస్ కైవసం చేసుకుంది. ఈ మ్యాచ్లో హార్దిక్ పాండ్య అద్భుతంగా ఆడి జట్టు విజయంలో కీలక పాత్ర పోషించాడు.