Ind vs Aus 2nd ODI 2023 : భారత్-ఆస్ట్రేలియా మధ్య జరగుతున్నరెండో వన్డేలో టీమ్ఇండియా బ్యాటర్లు అదరగొడుతున్నారు. యంగ్ స్టార్ శుభ్మన్ గిల్ (104 పరుగులు : 97 బంతులు, 6x4, 4x6), కమ్బ్యాక్ ప్లేయర్ శ్రేయస్ అయ్యర్ (105 పరుగులు : 90 బంతులు, 11x4, 3x6) శతకాలతో చెలరేగిపోయారు. ఈ క్రమంలో గిల్ తన వన్డే కెరీర్లో ఆరో సెంచరీ నమోదు చేయగా.. అయ్యర్కు ఇది మూడవది.
రుతురాజ్ గైక్వాడ్ (8) ఔటైన తర్వాత క్రీజులోకి వచ్చిన అయ్యర్తో జతకట్టాడు గిల్. వీరిద్దరూ ఆసీస్ బౌలర్లలను చీల్చి చెండాడారు. స్ట్రైక్ రొటేట్ చేస్తూ.. వీలు చిక్కినప్పుడల్లా బౌండరీలు బాదుతూ.. స్కోర్ బోర్డును పరుగులు పెట్టించారు. మొదటి నుంచి రన్రేట్ 7 కు తగ్గకుండా చూసుకున్నారు. ఈ క్రమంలోనే ఇద్దరూ హాఫ్ సెంచరీలు పూర్తి చేసుకొని స్వేచ్ఛగా క్రీజులో పరుగులు చేశారు. ముఖ్యంగా అయ్యర్.. ఈ ఇన్నింగ్స్లో ఫోర్ల వర్షం కురిపించాడు. ఈ క్రమంలోనే వీరిద్దరూ సెంచరీలు పూర్తి చేశారు. వీరిద్దరూ రెండో వికెట్కు 200 పరుగుల భాగస్వామ్యం నమోదు చేశారు. దీంతో భారత్ తరఫున రెండో వికెట్కు అత్యధిక భాగస్వామ్యం నమోదు చేసిన ఆటగాళ్లలో ఈ జోడీ చేరింది.
ఇక సెంచరీ చేసిన కొద్దిసేపటికే అయ్యర్.. సీన్ అబాట్ బౌలింగ్లో క్యాచౌట్గా వెనుదిరిగాడు. తర్వాత 34.5 ఓవర్ల వద్ద గిల్ను.. గ్రీన్ పెవిలియన్ చేర్చాడు. అప్పుడు క్రీజులోకి వచ్చిన కెప్టెన్ కేఎల్ రాహుల్ కూడా సిక్స్లతో రెచ్చిపోయాడు. స్ట్రైక్ రేట్ 100 కు తగ్గకుండా ఆడుతూ 35 బంతుల్లోనే.. వరుసగా ఈ సిరీస్లో రెండో అర్ధ సెంచరీ బాదాడు. మరో ఎండ్లో ఉన్న ఇషాన్ కిషన్ (31 పరుగులు : 18 బంతుల్లో 2x2, 2x6) వేగంగా ఆడే ప్రయత్నంలో ఆడమ్ జంపాకు వికెట్ సమర్పించుకున్నాడు.